Búgin, 12 mamyr, Qazaqstanda jáne búkil álemde Halyqaralyq meıirger kúni – 141 eldiń meıirgerler qaýymdastyǵyn biriktiretin kásibı mereke atap ótilýde, dep habarlaıdy aqshamnews.kz
Búginde elimizdiń densaýlyq saqtaý júıesinde 190 myńnan astam orta býyn medısına qyzmetkeri, olardyń 146 myńnan astamy – meıirger jumys isteıdi, al aýyldyq jerlerde shamamen 55 myń maman eńbek etýde.
Sońǵy jyldary elimizdiń densaýlyq saqtaý júıesinde meıirgerlerdiń róli edáýir artty. Qyzmet aıasyn keńeıtý jáne ókilettikterdi berý arqyly meıirgerler medısınalyq kómekti komandalyq úlgide kórsetý júıesiniń ajyramas bóligine aınaldy.
Bul dárigerlerdiń júktemesin azaıtýǵa, pasıentter aǵynyn tıimdi úılestirýge, sondaı-aq medısınalyq qyzmetterdiń qoljetimdiligi men sapasyn arttyrýǵa múmkindik berdi.
Búginde keńeıtilgen praktıka meıirgerleri óz betinshe kelesi qyzmetterdi atqarady:
• pasıentterdi bastapqy qabyldaý jáne dınamıkalyq baqylaý;
• medısınalyq qujattar men elektrondyq jazbalardy júrgizý;
• dárigerdiń taǵaıyndaýy boıynsha aqparattyq júıeler arqyly tegin resept jazý;
• pasıentter aǵynyn retteý jáne suryptaý, qabyldaýǵa jazý;
• aktıvterdi tirkeý jáne turǵyndardy MSAK uıymdaryna tirkeý.
Meıirgerlerdiń jaýapkershilik salasyna sonymen qatar:
• dıspanserlik eseptegi pasıenttermen jumys;
• sozylmaly aýrýlardy basqarý baǵdarlamasy jáne ámbebap-progressıvti patronaj modeli sheńberinde konsýltasıa berý, oqytý jáne patronaj;
• vaksınasıalaý men skrınıngterdi qosa alǵanda profılaktıka sharalary;
• medısınalyq kómek kórsetýdiń barlyq deńgeıdegi halyqtyń densaýlyǵyn nyǵaıtýǵa qatysý jatady.
Densaýlyq saqtaý mınıstrligi mamandardy daıarlaýdyń satyly júıesin engizdi: standartty deńgeıden bastap mamandardyń quzyretterine qoıylatyn talaptarǵa sáıkes keletin «bakalavrıat – magıstratýra – doktorantýra» akademıalyq dárejelerine deıin.
Qazaqstanda meıirgerlerdi 94 medısınalyq kolej daıarlaıdy, onyń ishinde 22-si – memlekettik, 72-si – jekemenshik. Olardyń 39-y – joǵary medısınalyq kolej mártebesine ıe.
Jyl saıyn elimizde 23 000-nan astam jalpy beıindi maman daıarlanady, al sońǵy alty jyldyń ishinde qoldanbaly bakalavrıat dıplomy bar 20 000-nan astam meıirger densaýlyq saqtaý mekemelerine jumysqa ornalastyryldy.
Meıirger isin damytý jumystaryn úılestirý maqsatynda elimizdiń 20 óńirinde óńirlik úılestirýshiler taǵaıyndaldy. Olardyń qatarynda – praktıkalyq densaýlyq saqtaý salasynyń, bilim berý uıymdarynyń jáne basqarý organdarynyń ókilderi bar.
Qazaqstan Respýblıkasy Densaýlyq saqtaý mınıstrligi barlyq meıirgerlerge halyqtyń densaýlyǵyn saqtaý isine qosqan baǵa jetpes úlesi, biliktiligi, janashyrlyǵy men adaldyǵy úshin shyn júrekten alǵys bildiredi. Tek meıirgerler ǵana árqashan pasıenttiń janynan tabylady, ómirdiń eń qıyn ári jaýapty sátterinde qoldaý kórsetedi.
Kásibı merekege baılanysty 14-16 mamyr kúnderi Túrkistan qalasynda «Meıirger qyzmetiniń ınovasıalary men damý perspektıvalary» atty halyqaralyq forým jáne Qyzylorda qalasynda «QR-da táýelsiz meıirger isiniń eń úzdik praktıkalaryn engizý» taqyrybynda halyqaralyq ǵylymı-praktıkalyq konferensıa ótedi.