2025 jylǵy 30 sáýirde QR Oqý-aǵartý mınıstrligi jetim balalar men ata-anasynyń qamqorlyǵynsyz qalǵan balalarǵa tálimger bolǵysy keletin azamattar úshin mindetti oqytýdy engizetin buıryq shyǵardy. Oqý kýrsyn aıaqtaǵannan keıin, tálimgerge biliktiligin rastaıtyn sertıfıkat beriledi, dep habarlaıdy aqshamnews.kz
Oqytýdy tálimgerlikpen aınalysatyn uıymdar júrgizedi. Kandıdattar jazbasha ótinish berip, qajetti qujattardy tapsyrady. Oqý uzaqtyǵy eki aptadan aspaıdy. Kýrsty aıaqtaǵan soń testileý ótkiziledi, ony sátti tapsyrǵan azamattarǵa sertıfıkat beriledi.
«Tálimgerlerdi mindetti sertıfıkattaý — ata-anasynyń qamqorlyǵynsyz qalǵan balalarǵa sapaly qoldaý kórsetýdi qamtamasyz etýdiń mańyzdy qadamy. Daıyndyqtan ótken tálimgerler balalardyń áleýmettenýine jáne eresek ómirge daıyndyǵyna tıimdi kómektese alady dep senemiz», — dep atap ótti QR Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova.
Tálimger bolýǵa úmitker — QR kámeletke tolǵan azamaty, qorǵanshylar men qamqorshylarǵa qoıylatyn talaptarǵa sáıkes kelýi tıis. Tálimgerlik qyzmet aqysyz túrde júzege asyrylady jáne 10 jastan asqan, jetim balalar men ata-anasynyń qamqorlyǵynsyz qalǵan balalarǵa arnalǵan bilim berý uıymdarynda tárbıelenip jatqan balalarǵa qoldaý kórsetýge baǵyttalǵan.
Eske salsaq, Qazaqstanda tálimgerlik ınstıtýty 2024 jyly engizilgen bolatyn. Onyń maqsaty — jetim jáne ata-anasynyń qamqorlyǵynsyz qalǵan balalarǵa jeke qoldaý kórsetý. Bul mehanızm tárbıelenýshilerdi óz betinshe ómir súrýge daıyndaýǵa yqpal etedi.