Abaı oblysyndaǵy Shúlbi sý qoımasynan Pavlodar oblysy aýmaǵyndaǵy Ertis ózeniniń jaıylymyna 6,3 mlrd tekshe metrden astam sý jiberildi. Bul jumysty Sý resýrstary jáne ırrıgasıa mınıstrligi tabıǵatty qorǵaý maqsatynda júrgizip jatyr, dep habarlaıdy aqshamnews.kz
Ertis ózeniniń jaıylmaly aýmaǵyndaǵy flora men faýnanyń tirshilik etý ortasyn jáne tabıǵı ónimdiligin saqtaý úshin jyl saıyn sý jiberilip turady. Búgingi tańda ózenniń orta aǵysyndaǵy balyqtardyń ýyldyryq shashatyn tabıǵı aımaqtary sý astynda qaldy. Sondaı-aq sý jiberý Ertis ózeniniń arnasyn tazalaýǵa da baǵyttalǵan.
Qazir Pavlodar oblysyndaǵy gıdrobeketterde sý deńgeıiniń kóterilgeni jáne Ertis ózeniniń jaıylymdy aýmaqtaryn sý basqany baıqalyp otyr. Sondaı-aq Pavlodar oblysynda Shiderti ózeniniń jaıylymyna da tabıǵatty qorǵaý maqsatynda sý jiberilip jatyr. Búgingi tańda K. Sátbaev atyndaǵy kanaldan 60 mln tekshe metrden astam sý baǵyttaldy.
Ekibastuz qalasy men Aqtoǵaı aýdanynyń aýyldyq aýmaǵyndaǵy flora men faýnany saqtaýǵa, sondaı-aq Áýlıekól kólder júıesi, Basentın jáne Shyǵanaq kólderin toltyrýǵa jalpy kólemi 120 mln tekshe metr sý baǵyttaý josparlanyp otyr.
Búginde Ekibastuz qalasynyń aýyldyq aımaǵyndaǵy 9 myń gektardan astam kóltabandar sýǵa toldy. Jalpy alǵanda 21 myń gektardan astam alqapqa sý jiberý josparlanǵan. Tabıǵatty qorǵaý jumystary bastalǵannan beri Shyǵanaq kóline 10 mln tekshe metr sý keldi.
«Tabıǵatty qorǵaý maqsatynda jiberiletin sý tek qorshaǵan ortany jáne óńirdiń tabıǵı baılyǵyn saqtaýǵa kómektesip qana qoımaıdy. Bul aýyl sharýashylyǵynyń, mal sharýashylyǵynyń jáne jalpy Pavlodar oblysy ekonomıkasynyń damýyna yqpal etedi. Al bul jergilikti halyqtyń turmysyna oń áserin tıgizedi»,
- dedi Sý resýrstary jáne ırrıgasıa mınıstri Nurjan Nurjigitov.