Sportshy bar bolǵany 25 jasynda kisi qolynan ólgen edi.
Alty jyl buryn dál osy kúni Denıs Ten kóz jumǵan edi, dep habarlaıdy Almaty-akshamy.kz
Bloger Aleksandr Soı sportshynyń ólgen kúni týraly óziniń Facebook paraqshasyna estelik jazdy.
«Sol sátte Mega Parkte júrgen edim. Sumdyq habardy estigennen keıin búkil oıyn-saýyq ortalyǵynda mýzyka toqtady, dúkenderdiń jaryǵy óshti, adamdar sol jerde jylap jatty… Denıs meıirim men eńbekqorlyqtyń, talanttyń jarshysy edi. Kenetten ol joq bolyp ketti. Men áli kúnge deıin bul qazaǵa sene almaımyn. Bir qaljyńbastyń sátsiz ázili sıaqty kórinedi. «Dostar, men eshqaıda ketpedim. Senderge aıtar jańalyǵym kóp» dep kirip keletin sıaqty. «Denıs, bizdiń munda ne oılaǵanymyzdy bilmeısiń ǵoı!» dep jamyraı qarsy alamyz, sosyn búkil qaıǵy seıiletin sıaqty. Denıs bul álemge qaıtadan jaryq sáýle, úılesim, súıkim men mahabbat ákelýin jalǵastyra túsedi. Biraq bulaı bolmaıdy… Keshir bizdi, chempıon!»
Denıs Ten – muz ústinde mánerlep syrǵanaýdan Qazaqstannyń atyn alǵash álemge tanytqan jaryq juldyz edi. 2014 jyly mánerlep syrǵanaýdan Sochı olımpıadasynyń qola júldegeri atanyp, 2013 jylǵy álem chempıonatynda kúmis medalǵa ıe boldy. VII qysqy Azıa oıyndarynda mánerlep syrǵanaýdan chempıon atanǵan. Qazaqstannyń úsh dúrkin chempıony. Qazaqstan Respýblıkasynyń halyqaralyq dárejedegi sport sheberi.
Sportshyny 2018 jyly 19 shildede Almatyda pyshaqtap, óltirip ketti.