Qorǵanys mınıstri Rýslan Jaqsylyqov áskerge shaqyrylǵan sarbazdar mindetti túrde menıngıtke tekseriletinin aıtty, dep habarlaıdy Almaty-akshamy.kz.
Buǵan deıin Jetisý oblysynda áskerge barǵanyna 3-aq aı bolǵan sarbazdyń kóz jumǵany habarlanǵan edi. Ol menıngıt aýrýynan kóz jumǵan. Mınıstr osy jaǵdaıdan keıin sarbazdardyń densaýlyǵyn jeke baqylaýyna alǵanyn jetkizdi.
«Sarbazdyń otbasyna kóńil aıtamyn. Ol menıngıt aýrýynan kóz jumdy... Ókinishke qaraı, mindetti túrde tapsyratyn medısınalyq analızderdiń tiziminde menıngıtke tekserilý joq. Qazir ony biz tizimge qosý boıynsha jumys istep jatyrmyz. Osy jaǵdaıdan keıin men tıisti sheshim qabyldadym, tıisti qarjy bólindi. Sarbazdar áskerı bólimge kelgennen keıin olardy 100% menıngokokqa tekseremiz. Eger aýrý anyqtalsa, olar 5-7 kún boıy dári iship, emdeledi», - dedi Rýslan Jaqsylyqov Parlamenttiń birlesken otyrysynan soń.
Sondaı-aq ol aýrýdan kóz jumǵan sarbazdyń ata-anasy dárigerler qoıǵan dıagnozben kelispeı otyrǵanyn atap ótti.
«Men de ákemin. Olardy túsinemin. Mundaı jaǵdaıdyń bolǵany bárimizge aýyr tıdi. Qazaqta «ajaly keldi» degen sóz bar. Saraptama (dárigerler qoıǵan dıagnozdy) rastady», - dedi mınıstr.