Jańa qyzmet túri taıaýda Nur-Sultan qalasynda iske qosylmaq.
Endigi ýaqytta qazaqstandyqtar termınaldyń kómegimen jeke kýálik jáne tólqujat fotosyna ózderi túsip, unaǵan sýretti tańdaı alady. Bul týraly «Azamattarǵa arnalǵan úkimet» memlekettik korporasıasynyń basqarma tóraǵasy Súıenish Ábdildın málim etti, dep habarlaıdy Almaty-akshamy.kz QazAqparatqa silteme jasap.
«Búginde azamattardyń 80 paıyzy Halyqqa qyzmet kórsetý ortalyqtaryna 10 qyzmet boıynsha jıi júginedi. Onyń beseýi ishki ister mınıstrligi salasyna qatysty. Bizdiń maqsat – qyzmetterdi avtomattandyrý, al onlaın qoljetimdi qyzmet túrlerin odan ári jetildire túsý. Jyl sanap halyqqa qyzmet kórsetý ortalyǵyna keletin klıentterdiń sany azaıyp keledi. Halyq qyzmettiń kóbisin onlaın alyp jatyr. Bıylǵy jyldyń birinshi toqsanyn alsaq, ótken jylmen salystyrǵanda 10 paıyzǵa azaıǵan», - dedi Súıenish Ábdildın ortalyq komýnıkasıalar qyzmeti alańynda ótken baspasóz máslıhatynda.
Onyń aıtýynsha, ótken jyly HQO arqyly 2,4 mln qazaqstandyq jeke kýálik jáne tólqujat alǵan.
«Bizdiń tarapymyzǵa halyqtan jeke qujattaǵy fotonyń sapasyna qatysty shaǵymdar túsip jatady. Osy oraıda biz İshki ister mınıstrligimen birlesip ózine qyzmet kórsetý termınalyn engizip jatyrmyz. Mınıstrlik atalǵan bastamany qoldap otyr. Termınal bıometrıalyq jáne ınterfeıs júıesimen qamtylǵan. Klıent sýretke ózi túsip, qalaǵan fotony tańdaı alady. Odan ári ortalyq qyzmetkerine ótinishin beredi. Qazir osy máselege qatysty birlesken buıryq shyǵarý qaralyp jatyr», - deıdi ol.