Kompanıa mamandary izdeý júıesinde jasandy ıntellektiniń birneshe fýnksıasyn engizdi.
Ol izdeýshilerge qajetti aqparatty aýdıo jáne beınejazba arqyly tabýǵa múmkindik beredi. Jańartylǵan júıeniń artyqshylyǵy men kemshiligi jaıly aıtsaq. Google izdeý júıesinde ózgeris engizbes buryn jasandy ıntellektiniń sholýlaryn synap kórdi. Endi jańartylǵan nusqany jyl sońyna deıin 1 mlrd-tan astam paıdalanýshy qoldana alady, dep habarlaıdy Almaty-akshamy.kz 24.kz-ke silteme jasap.
Onyń artyqshylyǵy sol maǵlumat izdeýshiler aqparatty burynǵydaı jazbasha emes, daýys, beıne arqyly jyldam taba alady.
Sýndar Pıchaı, Google bas dırektory:
Adamdar izdeý júıesine uzynnan uzaq suraq qoıyp, fotosýretterin salsa da, Google qajetti ári eń sapaly aqparatty birden taýyp beredi. Jańartylǵan júıe osy aptada AQSH-ta tolyq iske qosylady. Jaqyn arada basqa elderde de engiziledi.
Júıedegi ózgeristiń tıimsiz tusy da bar. Jasandy ıntellekt sholýlary avtorlyq quqyqpen qorǵalǵan materıaldardy zańsyz paıdalanýy múmkin. Sondaı-aq veb-saıttardyń qaralym sanyn azaıtyp, jarnama tabysyn tómendetip jiberýi múmkin degen kúdik te bar.
Djeıms Manáka, Google tehnologıa, qoǵam jáne zertteý jónindegi aǵa vıse-prezıdenti:
Bul júıe adamdarǵa kúndelikti mindetterinen shyǵarmashylyq bastamalaryna deıin kómektese alady. Biraq kez kelgen jańa tehnologıa sıaqty áli de jetildirýdi qajet etedi. Týyndaǵan máselelerdi der kezinde qarastyryp, sheship otyrýǵa kúsh salamyz. Óz tájirıbemizden sabaq alyp, qoǵam úshin barynsha paıdamyzdy tıgizýge tyrysamyz.
Byltyr Google 175 mlrd dollar kóleminde tabys taýyp, kiris kózin ulǵaıtty. Eger izdeý júıesi veb saıttardyń jarnama tıimdiligine nuqsan keltirse, tapqan tabysynan aıyrylyp qalýy múmkin. Biraq kompanıa basshylyǵy alańdaýǵa esh negiz joq deıdi.
Sýndar Pıchaı, Google bas dırektory:
Munyń bári jasandy ıntellektini kópshilikke paıdaly etý úshin qabyldanǵan batyl sheshim. Kompanıa úshin mańyzdy progres der edim.
Google negizi qalanǵaly keıingi 34 jylda mundaı qadamǵa alǵash baryp tur. Sondyqtan kompanıa basshylyǵynyń jańartylǵan júıeden úmiti zor. Al sarapshylar tehnologıalyq alpaýyttyń bastamasynyń ózge veb saıttarǵa áseri qalaı bolatynyn ýaqyt kórsetedi dep otyr.