Halyqtyń qozǵalýy qıyn toptaryna arnalǵan jerasty jáne jerústi jaıaý júrginshiler ótkelderine lıft pen kótergishti ornatý boıynsha eki joba aıaqtalý satysynda.
Almaty qalasy Bostandyq aýdanynyń ákimi Altaı Rahymbetov Óńirlik komýnıkasıalar qyzmetiniń baspasóz konferensıasy barysynda qala turǵyndarynyń qoǵamdyq keńistikti jaqsartýǵa, kórkeıtýge, megapolısti damytýǵa belsendi tartylǵany týraly aıtyp berdi, dep habarlaıdy Almaty-akshamy.kz
«Bostandyq aýdanynyń turǵyndary «Búdjetke qatysý» jobalaryn tańdaýǵa jáne talqylaýǵa qyzyǵýshylyqpen qatysady, olardyń ornyna demalys pen bos ýaqyt úshin zamanaýı ınfraqurylym alady. Mysaly, bıyl biz 9 balalar men sport alańdaryn jóndep, 13 qoǵamdyq keńistikti abattandyrdyq», - dedi Altaı Rahymbetov.
2022 jyly «Búdjetke qatysý» baǵdarlamasy boıynsha 21 jobany iske asyrý josparlanǵan. Bostandyq aýdanynyń turǵyndary abattandyrý boıynsha nazar aýdarýdy qajet etetin ýchaskelerdi tańdaý múmkindigine ıe boldy.
Sonymen qatar, qalada saıabaqtardy, skverlerdi, bólý jolaqtaryn, qoǵamdyq paıdalaný oryndaryn, Úlken Almaty jáne Esentaı ózenderiniń jaǵalaýlaryn, kólik aıryqtaryn jınaý jáne kútip ustaý, sondaı-aq aryq jelilerin tazalaý jumystary júrgizilýde.
Aýdanda kógaldandyrý jumystary qarqyndy júrgizilýde, bıyl 7 250 aǵash kóshetteri men 2 220 butalar otyrǵyzyldy. Kóktemde 31 941 sharshy metr alańǵa gúlder otyrǵyzyldy, magıstraldy kósheler boıyndaǵy 319 gúlzar retke keltirildi.
Aýdan qyzmetteri qoqys jáshikterin, oryndyqtardy, qoǵamdyq kólik aıaldamalaryn, kóshe boıyndaǵy qorshaýlar men jolaıyryqtardy boıaý jumystaryn aıaqtady. Sondaı-aq, sýburqaq pen murajaıdyń irgeles aýmaǵyn jóndeý aıaqtaldy. Á. Qasteev atyndaǵy saıabaqtaǵy fontanǵa kúrdeli jóndeý jumystary júrgizildi. Úlken Almaty - ál-Farabıdegi kópirasty keńistigi aýmaqtaryn aǵymdaǵy jóndeý aıaqtaldy.