Jaıly orta qurý boıynsha jumystar barlyq jerde júrgizilýde
Aýlalardy abattandyrýdyń mindetti elementteri balalar oıyn alańy, turaq, jaryqtandyrý, kógaldandyrý, oryndyqtar men qoqys jáshikteri boldy. Bul týraly Almaty qalasy Bostandyq aýdanynyń ákimi Altaı Rahymbetov málimdedi, dep habarlaıdy Almaty-akshamy.kz
Óńirlik komýnıkasıalar qyzmetiniń baspasóz konferensıasynda sóz sóılegen ol Bostandyq aýdanynda 135 PIK pen PKSK qyzmet kórsetetin 1 866 kóp páterli turǵyn úı bar ekenin aıtty. Alaıda, birtindep turǵyndar basqarýdyń jańa formalaryna kóshýde. 529 kóp qabatty úıdiń turǵyndary 123 MIB jáne 290 jáı seriktestik qurdy.
«34 kóp páterli úıdiń turǵyndary «Nurly jer» baǵdarlamasyn paıdalanyp, 85 lıft jabdyǵyn jańartty, 11 úı boıynsha shatyrdy, ınjenerlik jelilerdi aýystyrý jáne qasbetterdi syrlaý boıynsha jóndeý jumystary aıaqtaldy, 7 úıde jóndeý jumystary júrgizilýde», - dep jalǵastyrdy sózin Altaı Rahymbetov.
Sonymen qatar, ınvestorlardy tartý esebinen kóp páterli turǵyn úılerdiń 4 qasbeti boıaldy. Sondaı-aq, 19 balalar alańy abattandyryldy, jyl sońyna deıin taǵy eki alań paıdalanýǵa beriledi dep josparlanýda.
Sondaı-aq, Altaı Rahymbetov ınjenerlik ınfraqurylymnyń jańartylǵany týraly habarlady. Mysaly, tómen qysymdy jerasty gaz qubyrynyń 27,1 shaqyrymy qaıta jańǵyrtyldy, eskirgen elektr kabel jelileriniń 2,9 shaqyrymy aýystyryldy.
Aýlalar men kóshelerdi jaryqtandyrýǵa kóp kóńil bólinedi. Bıyl 155 ýchaskeni jaryqtandyrý josparlanǵan, 140 kósheniń jumystary aıaqtaldy. Sózin qorytyndylaǵan aýdan ákimi 16 kóshe men uzyndyǵy 17 shaqyrym bolatyn jolaıryǵynda ortasha jóndeý jumystary aıaqtalǵanyn habarlady.