Ótken paıymymyzda sóz etken «Bas shilde» amaly aıaqtalýda. Babalardyń aıtýyna baılanysty jazǵanymyzdaı: amal kezinde jańbyr da jaýdy, kún kúrkirep, naızaǵaı da oınady, ańyzaq kúnder de az bolǵan joq.
Shilde aıynyń ortasynan aýa jer qurǵap, shópterdiń býyny qatyp, sarǵaıa bastaıdy. Malǵa da, janǵa da jaıly kez bastalady. «Úrker tolǵaǵy» amalynyń keletin kezi, mine, osy mezgil.
Úrkerdi oryssha «Deva» dep ataıdy. Týra maǵynasynda aýdarylǵandyqtan qazaqshasy «Bıkesh» delinip júr. Al Júsip Balasaǵun «Bıdaı basy» dep ataǵan eken. «Jeti qaraqshynyń» qyzyn urlaǵan Úrker osy.
Qazaq Úrker, Tarazy, Úsh Arqar juldyzdaryn «bólek týyp birge batqan úsh juldyz» dep aıtady. Úsheýi de jyldyń ár mezgilinde týǵanymen, bir kúnde – mamyr aıynyń sońyna taman (jıyrma toǵyz, otyzy shamasynda) «jerge kirip», kórinbeı ketedi. Sonan soń Úrker Sarsha aıynda (shilde), Tarazy tamyzda týady. Sol shoqjuldyzdar shoǵyry kózge kórinip, juptasyp, kókke kóterilmeı, shildeniń aptaby basylmaıtyn kórinedi.
Atalmysh aıdyń alǵashqy onkúni bitisimen juldyzdar shoǵyry toptasyp, juptasyp, kókke baǵyt aldy. Mine, sol Úrkerdiń («Bıdaı basy») qazir tolǵaǵy júrip jatyr. Aýa raıynyń turaqsyz bolýy, kúnniń kúrt ysýy, jańbyrdyń jaýýy, bári-bári osy amaldyń saldary. Úrker týǵan soń jer qurǵaıdy, kún ysıdy, shópterdiń sabaǵy qataıyp, ózi sarǵaıady. Bul malǵa da, janǵa da jaıly kezeń.
Osy kezde Syr boıynda, ońtústik óńirlerde bıdaıǵa oraq tússe, astyqty Arqa aımaǵynda bıdaı masaǵy qamyrlanyp, bas baılaıdy, ol qataıa kele dánge, dán nanǵa aınalady. Álemge aty áıgili ǵulama Balasaǵunnyń «Bıdaı basy» dep at qoıyp, aıdar taǵýy osydan bolsa kerek. Úrker amaly jazdyń bel ortaǵa kelgendigin bildiredi. Bul mezgilde keıde uzaqqa sozylǵan sylbyr jaýyn jaýady, keıde sarsha tamyzǵa jalǵasqan qapyryq ystyq bolady.
Úrker juldyzynan jıyrma kúndeı keıin Tarazy juldyzy týady. Tarazy shoqjuldyzy shildeniń ort asy aýa shyǵystan kórinip, kúz, qys boıy Úrkerdiń sońyn ala, batysqa qaraı aýady. Tarazy týǵannan keıin Súmbile týady. Sóıtip, qońyr kúzdiń ortasy aýa, qara kúzdiń basynda Úrker bastaǵan Tarazy, Súmbile (Úsharqar) juldyzdar shoǵyry batysqa qaraı baǵyt alady. Bul kórinis kún men tún teńeskenin, endi kún uzara bastaıtyn mezgil-mezet jetkenin bildiredi.
Qazir grıgorıansha, shildeniń – 13-i, aı kúntizbesi boıynsha, – 25-i, eskishe (qazaqsha) – 1 kúnnen keıin jańa aı bastalady. Aspan deneleriniń bildirýi boıynsha, aldaǵy aptada kún shýaqty qalpyn saqtaıdy. Jaýyn-shashyn sıreksıdi, apta sońyna qaraı salqyndyq kórinis berýi yqtımal.