Invataksıge muqtaj almatylyqtar onyń sanynyń jetispeıtinin aıtýda.
«Arbaǵa tańylǵandar arnaıy kóliktiń tapshylyǵynan qalada júrip-turýymyz qıyndady», - deıdi. Degenmen ákimdik ókili aldaǵy ýaqytta másele sheshimin tabady dep sendirgen. Múgedektigi bar adamdarǵa qyzmet kórsetetin kólikterdiń sanyn 100-ge jetkizý kózdelip otyr, dep habarlaıdy Almaty-akshamy.kz.
24.kz saıtynyń jazýynsha, Ulan İńkárbekov, ózimen taǵdyrlas jandardyń máselesin biraz jyldan beri kóterip keledi. «Invataksıge qatysty da shaǵymdar kóp», - deıdi ol. Ásirese, arbada otyratyn jandarǵa arnalǵan arnaıy jabdyqtalǵan kólik jetispeıdi. Qoldanysta júrgenderi eskirgen. Investorlar paıdasy az kásipke qarjy quıýǵa qulyqsyz.
«Invataksıde qatelikter kóp. Bizde kúnnen kúnge tutynýshylar kóbeıip jatyr. Burynǵy adamdarǵa taǵy qosymsha adamdar qosylyp jatyr. Sondyqtan mashına jetispeıdi. Biz ınvestorlardy kirgizeıik desek, olar 1 jylǵa kontraktige kirmeıdi. Bir jyldyń ishinde ol mashına ózin-ózi aqtamaıdy. Talaı kezdesýlerde, talaı joǵary jaqta da osy máseleni kóterip aıtyp júrgenim, kontrakt eń kemi 3 jylǵa jasaý kerek», - deıdi múgedekter qoǵamdyq birlestiginiń tóraǵasy Ulan İńkárbekov.
Qazir qalada múmkindigi shekteýli jandardy tasymaldaýmen aınalysatyn úsh kompanıa bar. Kúndelikti 64 kólik qyzmetke shyǵady. Olardyń 24-i ǵana arbada otyratyn eresekter men balalardy qajet jerine jetkizedi. Al qalǵan kólikter zaǵıp jandarmen aýtızmge shaldyqqandarǵa qyzmet kórsetedi. Almatyda arbada otyratyn 1500 adam bar ekenin eskersek, arnaıy kóliktiń jetpeıtini aıdan anyq.
«Biz 180 adamǵa qyzmet kórsetemiz. Iaǵnı, kúnine turaqty túrde 180 ótinish túsedi. Olar 12 kólikke bólinedi. Eń azy bir mashına kúnine 20 shaqyrym júredi. Tehnıka eskirgen. Jańa kólik alýǵa qarjy joq, tipti, olardy jóndeýden ótkizýge aqsha qolbaılaý», - deıdi ınvataksı qyzmetin kórsetetin kompanıanyń dırektory Emıl Maksýmov.
Ákimdik ókiliniń aıtýynsha, 2023 jylǵa ınvataksı qyzmeti úshin búdjetten 765 mln teńge bólingen. Biraq bul konkýrsqa eshqandaı qyzmet kórsetýshi kompanıa qatyspaǵan. Sebebi, bul qarajat az.
«Qazirgi tańda 2700 teńge - ol 1 mashınanyń 1 saǵatyna arnalǵan soma. Biz aqpan aıynda qalalyq búdjetke shaǵym túsirdik. 2700 teńgeden kóterý úshin jáne halyq maslıhattary sol suraǵymyzdy qabyldady. Jáne qosymsha qarajat berildi. 2700 teńgeden 3700 teńgege sheıin, 1 saǵattyq kóterildi. Jáne mamandandyrylǵan kólik boıynsha 2700 teńgeden 4500 teńgege deıin sol qarajat kóterildi. Bul bizge konkýrsqa jańa kompanıalardy tartýǵa múmkindik beredi», - deıdi jumyspen qamtý jáne ÁB basqarmasy basshysynyń orynbasary Qalıbek Aqylbek.
Qazirgi ýaqytta jańa baǵa negizinde áleýmettik qyzmet kórsetetin kompanıalarǵa arnalǵan konkýrstyń tehnıkalyq qujattamasy ázirlenýde. Áleýmettik jobaǵa bir mıllıard teńgeden astam qarjy qarastyrylǵan. Sondaı-aq, aldaǵy ýaqytta ınvataksı qyzmetindegi kólikter sanyn 100-ge jetkizý josparda bar.