Bilim jáne ǵylym mınıstri Asqat Aımaǵambetov «Bolashaq» baǵdarlamasynyń 28 jyldyǵymen quttyqtady, dep habarlaıdy Almaty.kz 24.kz-ke silteme jasap
«Bolashaq» stıpendıasy — QR Tuńǵysh Prezıdenti, Elbasy Nursultan Nazarbaevtyń bastamasymen qolǵa alynǵan biregeı strategıalyq joba. Baǵdarlama júzege asyrylyp kele jatqan 28 jyldyń ishinde 14 myńnan astam qazaqstandyq álemniń úzdik joǵary oqý oryndarynda bilim alý múmkindigine ıe boldy.
Búginde «Bolashaq» túlekteri túrli salalarda eńbek etip, el damýyna eleýli úles qosýda. Máselen, 800-ge jýyq stıpendıat densaýlyq saqtaý salasynda qyzmet atqarady jáne jyl saıyn ondaǵan myńnan astam kúrdeli ota jasaıdy. Bilim berý salasy úshin de 800-den astam maman daıyndaldy.
Olar ártúrli deńgeıdegi bilim berý uıymdarynda, onyń ishinde aýyldyq jerlerde de jumys isteıdi. Baǵdarlama túlekteri alǵan bilimderin is júzinde qoldanyp, ǵylym, ekonomıka, jýrnalısıka, mádenıet, ınovasıalar men tehnologıalar, memlekettik basqarý jáne basqa da sektorlardyń damýyna eńbek úlesterin qosyp keledi.
Ozyq ǵylymı tehnologıalardy transfertteý úshin Prezıdent Qasym-Jomart Toqaev álemniń jetekshi zertteý ortalyqtarynda jyl saıyn 500 ǵalymnyń taǵylymdamadan ótýin qamtamasyz etýdi tapsyrdy. Bul úshin ǵalymdarǵa arnalǵan taǵylymdamalar jańa sanaty bekitildi. «Bolashaq» baǵdarlamasynyń 28 jyldyǵymen quttyqtaımyn. Búginde elimizdiń talantty jastaryna qoldaý kórsetip kele jatqan «Bolashaq» stıpendıasy dúnıejúzine tanylǵan qazaqstandyq brendke aınalyp otyr».