Temirjanov pen Bıbosynov jartylaı fınaldy sátti aıaqtady
Bokstan Belgradta ótip jatqan álem chempıonaty sharyqtaý shegine jaqyn. Búgin jartylaı fınalǵa shyqqan bes qazaqstandyq boksshynyń tórteýi fınalǵa joldama aldy dep habarlaıdy Almaty-akshamy.kz Olympic.kz-ke silteme jasap.
Keshki sesıada Sáken Bıbosynov (51 keli) pen Serik Temirjanov (57 keli) sharshy alańǵa shyqqan bolatyn. Eki boksshy da Tokıo Olımpıadasynda baq synap, bireýi qolamen oralsa, ekinshisi jarysty ekinshi kezeńde aıaqtaǵan edi.
Belgrad sharshy alańy eki boksshy úshin de sátti bolyp tur. Sebebi, ekeýi de óz mansaptarynda alǵash ret álem chempıonatynyń fınalyna shyǵyp otyr.
Sáken Bıbosynov taılandtyq Tanaarat Saengfetti 4:1 esebimen utyp, sporttyq jolyndaǵy «qola dáýirin» aıaqtady. Búginge deıin álem chempıonaty men Olımpıadanyń qolasyn qanaǵat tutqan Bıbosynov erteń álem chempıonatynyń altyny úshin aıqasady. Fınalda Sáken amerıkalyq Roksı Holǵa qarsy shyqpaq.
57 kelidegi Serik Temirjanov ta jankúıer úmitin aqtady. Jartylaı fınalda Kýbanyń betkeustar boksshysy Osvel Garsıa Kabalerony nokdaýnǵa jibergen jerlesimiz álemdik dodanyń altynyna talasady. Bul álem chempıonatynda Qazaqstan men Kýba boksshylary alǵash ret kezdesip otyr. Qýanyshqa qaraı, bul jekpe-jek bizdiń boksshynyń jeńisimen aıaqtaldy.
Seriktiń fınaldaǵy qarsylasy – amerıkalyq Djamal Harvı.
Osylaısha, Qazaqstan komandasy sapynan tórt boksshy álem chempıonatynyń fınalyna joldama aldy. Tokıodaǵy toqyraýdan keıin bul keremet kórsetkish ekeni sózsiz.
Kúndizgi sesıada jeńiske jetken Temirtas Júsipov 33 jasynda, Mahmud Sabyrhan 20 jasynda álem chempıonatynyń fınalyna joldama alyp otyr.