Elimizde bódene jumyrtqasyna suranys artyp keledi. Nýtrısıolog mamandar onyń eti de, jumyrtqasy da dárýmenge toly deıdi. Sondyqtan qan azdyq, qaterli isik, asqazan aýrýlaryna shaldyqqan azamattar bul ónimge jıi tapsyrys bere bastaǵan.
Erekshe kásipti ıgerýge bet burǵan azamattar da muny rastap otyr, dep habarlaıdy Almaty-akshamy.kz qazaqstan.tv-ge silteme jasap.
Jańabek Esbergenov 8 jyldan beri bódene asyraıdy. Onyń jumyrtqasy men etin Elordanyń saýda dúkenderine satyp, tabys taýyp otyr. Keleshekte bódene fermasyn ashýǵa nıetti. Kásipker búginde qustarynyń sanyn 5 myńǵa jetkizgen.
«Bul kásipti eki júz jumyrtqadan bastadyq. Balapan shyǵaryp, kóbeıtip, qazirgi tańda bir shyǵarǵan kezde 2000-3000 balapan shyǵaramyz. Bul qustyń artyqshylyqtary kóp. Tumaýmen aýyrmaıdy. Bıt juqpaıdy. Salmonella aýrýymen aýyrmaıdy. Óıtkeni dene qyzýy 42 gradýs», -deıdi kásipker Jańabek Esbergenov.
Ónimniń dámi qyshqyl bolǵanmen, paıdasy kóp. Oǵan keıipkerimizdiń asqazan jarasynan bódeneniń shıki jumyrtqasyn iship, emdelgeni dálel. Az ýaqytta aýrýdan aıyqqan Jańabek Esbergenov qazir ózgelerge de keńes berip júr.
«Tósekte tura almaı buratylyp jatatynmyn. Sol ýaqytta asqazanǵa paıdaly ekenin bildim de, iship bastadym. Kúnine ash qarynǵa 5-6 jumyrtqadan, 10-15 kúnnen keıin asqazanym qoıdy. 7-8 jyl ótti. Áli densaýlyq syr bergen emes», -deıdi kásipker Jańabek Esbergenov.
Mamandar bul ónimdi tutyný arqyly qaterli isik pen qanazdyq, gınekologıalyq aýrýlardan aıyǵýǵa bolatynyn aıtady. Bastysy ash qarynǵa ishý kerek, alkogóldik sýsyndardy aralastyrmaý qajet eken.
«Onkologıa, «A» dárýmenin jetispeýshiligi, temirdiń jetispeýshiligi, magnııdiń jetispeýshiligi, kálsıdiń jetispeýshiligi bolsa, bódene jumyrtqasy paıdaly. Jaı ǵana profılaktıka úshin 1 dana, al emdik maqsatta bolsa, 2-3 danadan jeseńiz bolady», -deıdi nýtrısıolog maman Gúlbaný Taımahanova.
Bódene ár 16 saǵat saıyn jumyrtqalaıdy. Qazir ónimniń naryqtaǵy quny 50 teńgeden kem emes. Al etiniń kelisi 5 myńnan asady. Baǵasy qymbat bolǵanmen, oǵan degen suranys joǵary.