Qazaqstandyq kásipkerler zardap shekken shaǵyn jáne orta bıznes nysandaryna qarjylaı kómek kórsetý úshin arnaıy qor qurdy
Oǵan táýlik ishinde 1 mıllıardqa jýyq qarajat jınaldy. Bul týraly Almaty qalasy kásipkerler palatasy óńirlik keńesiniń tóraǵasy Maksım Baryshev málimdedi, dep habarlaıdy Almaty-akshamy.kz «Habar 24»-ke silteme jasap.
Onyń aıtýynsha, barlyq qarjy operasıasy sıfrlandyrylyp, jurtqa jarıalanyp otyrady. Al 30 kásipkerden turatyn arnaıy komısıa aqshanyń bólinýin muqıat qadaǵalaıdy. Búlikten bızneske kelgen zalal 100 mıllıard teńgeden asty. Sońǵy málimetter boıynsha, bir jarym myńnan astam kásipker shyǵynǵa batty.
«Zardap shekken kásipkerler ınfoqazaqstan.kz saıtyna kirip, ótinish qaldyra alady. Onda kelgen shyǵyn aýqymy men kólemin foto jáne vıdeoderekter arqyly tirkeý kerek. Qorǵa túsken qarajat arnaıy komısıanyń sheshiminen keıin bólinedi», - deıdi Almaty qalalyq kásipkerler palatasy óńirlik keńesiniń tóraǵasy Maksım Baryshev.