Memleket basshysy Ujymdyq qaýipsizdik sharty uıymynyń kezekten tys samıtiniń qorytyndysyna kóńili tolatynyn aıtyp, UQSHU boıynsha odaqtastaryna terorıstik akt kezinde qoldaǵany jáne Qazaqstanǵa kórsetken kómegi úshin alǵys bildirdi, dep habarlaıdy Almaty-akshamy.kz
Qazaqstan Prezıdenti UQSHU Bas hatshysynyń jeke óziniń jáne Hatshylyqtyń barlyq qyzmetkeri men UQSHU-nyń Birikken shtabynyń elimizdegi bitimgerlik mısıasyn uıymdastyrý jónindegi kúsh-jigerine qosqan úlesin atap ótti.
«Atalǵan jaǵdaı Uıymnyń áskerı-saıası qurylym retindegi mańyzdy ekenin taǵy bir márte dáleldedi. Qazir Ujymdyq qaýipsizdik sharty uıymy týraly halyqaralyq qoǵamdastyqta áńgime bolyp jatyr dep oılaımyn. Uıymnyń tıimdiligi qazirgi jaǵdaıda meılinshe aıqyn kórindi. Sondyqtan keleshekte UQSHU ózin paıdaly qurylym retinde tanytady dep paıymdaımyn. Hatshylyq ózge halyqaralyq uıymdardyń basshylyǵymen aradaǵy yqpaldastyqty jolǵa qoıýy kerek dep oılaımyn. Bul óte paıdaly bolady. UQSHU Bas hatshysynyń Bitimgerlik operasıalar jónindegi arnaýly ókiliniń ınstıtýtyn qurý da óte durys bolady dep sanaımyn», – dedi Qasym-Jomart Toqaev.
UQSHU Bas hatshysy Qazaqstanda UQSHU bitimgerlik mısıasynyń oryndalý barysy, onyń ishinde Qazaqstan Prezıdenti belgilegen merzim ishinde Uıymǵa múshe memleketter kontıngentterin elimizden shyǵarýǵa daıyn ekeni týraly aqparat berdi.