Ol qazaq ánderiniń kópshiligi radıoǵa jaramaıtyny týraly aıtyp, basy daýǵa qalǵan edi.
"Bıznes FM" radıostansıasynyń bas dırektory Rústem Maqsutov ózin-ózi qorǵaý úshin sotqa júginip, sózderiniń aq-qarasyn ajyratý maqsatynda fılologıalyq saraptama jasatqan, dep habarlaıdy Almaty-akshamy.kz
Rústem Maqsutovtyń beınejazba arqyly kórsetilgen sózderinde ult arazdyqty qozdyrý belgileri joq. Azamattardyń ar-namysy men qadir-qasıetin qorlaý belgileri joq. Rústem Maqsutovtyń sózderinde qazaq tiliniń bedelin túsiretin belgiler tabylmady. Qazaqstan Respýblıkasynda qazaq tilin shekteý qajettiligi týraly sóz aıtylmaǵan, – delingen Maqsutovtyń ózi oqyp bergen sot saraptama nátıjesinde.
Rústem Maqsutov qazaqsha ánder týraly aıtqan sózderi kópshiliktiń kóńiline tıip ketkenin moıyndaıdy. Ol taralǵan beınejazbada “men qazaqsha ánderdi jaqsy kórmeımin” dep aıtpaǵanyn alǵa tartady.
«Meniń sózderim eki jaqty qabyldandy. Bul meniń kinám jáne men ony moıyndaımyn. Men bul sózderdi aıtqan kezde oıymda múldem basqa nıet boldy. Osy sátte meni qoldaǵandar boldy jáne kerisinshe meni dattaǵandar da tabyldy. Sol azamattardyń aldynda resmı túrde keshirim suraımyn. Óz-ózime degen senimdiliktiń qursaýyna túsip qalǵandaı kúıdemin. Men qatelik jasaǵanymdy moıyndaımyn. Men sizderden keshirim suraımyn», – dedi "Bıznes FM" radıostansıasynyń bas dırektory.