Almaty ákimdigi joǵary oqý oryndarynyń basshylyǵymen birlesip jataqhanalarda jaıly turý úshin basqa qaladaǵy stýdentterdi oryndarmen qamtamasyz etý boıynsha turaqty jumys júrgizedi.
Aıta keteıik, megapolıste 35 JOO ornalasqan, onda 199 myńnan astam stýdent oqıdy, onyń 124 myńy basqa qaladan kelgender. Bul týraly ÓKQ brıfıńinde qala ákiminiń orynbasary Arman Qyryqbaev málimdedi, dep habarlaıdy Almaty-akshamy.kz.
Sonymen qatar 9 JOO (Ál-Farabı atyndaǵy QazUÝ, Q.Sátpaev atyndaǵy QazUTZÝ, Abaı atyndaǵy QazUPÝ, S. Asfendıarov atyndaǵy QazUMÝ, Narhoz, HOK, KIMEP, Turan, UIB) 3 284 stýdent turatyn 23 jataqhanamen yntymaqtastyq týraly memorandýmǵa qol qoıdy. Memorandýmdar jasasý kezinde sanıtarlyq jáne órtke qarsy qaýipsizdik normalarynyń saqtalýy eskerildi, ýákiletti organdar (Tótenshe jaǵdaılar departamentteri, Almaty qalasynyń sanıtarlyq - epıdemıologıalyq baqylaý departamentteri jáne qala qurylysyn baqylaý basqarmasy) tekserý júrgizdi.
«Aǵymdaǵy jyldyń qyrkúıek aıynda basqa qaladan kelgen stýdentterdiń 50%-dan astamy tósek-orynmen qamtamasyz etildi. Bul 30-35% aralyǵynda ózgeretin álemdik kórsetkishterden edáýir asyp túsedi. 2016 jyldan bastap tósek-oryndarǵa qajettilikti anyqtaý maqsatynda biz qalanyń joǵary oqý oryndary arasynda saýalnama júrgizip kelemiz. Jyl saıyn tapshylyq shamamen 32-35 myń oryndy quraıdy. Osy sharanyń arqasynda máseleniń ótkirligi oqý jylynyń basynda joıylady», - dep túsindirdi ÓKQ spıkeri.
Búgingi tańda qalada 102 jataqhana jumys isteıdi, onda 33,5 myńnan astam stýdent turady.
2025 jyldyń sońyna deıin 12 myń tósek-oryn, al 2030 jyldyń sońyna deıin taǵy 20 myń tósek – oryn qurý josparlanǵan, bul jataqhana tapshylyǵy máselesin tolyǵymen sheshýge múmkindik beredi.
Osy jyldyń naýryz aıynda stýdenttik jataqhanalar salý boıynsha jobalyq keńse iske qosyldy. 2023 jyldyń sońyna deıin 3 959 tósek-orynǵa arnalǵan 15 nysandy paıdalanýǵa berý josparlanýda, onyń ishinde 1 550 tósek-orynǵa arnalǵan 7 nysan aǵymdaǵy jyldyń qyrkúıek aıynda iske qosyldy.