Bizdiń maqtanyshymyz: QAZAQTYŃ BAǴYNA QUDAI BERGEN DIMASH

Búgin qazaqtyń mańdaıyna bitken jaryq juldyzy – Dımash Qudaıbergenniń týǵan kúni. Osy ataýly kúnge oraı saıtymyzdaǵy «BİZDİŃ MAQTANYSHYMYZ» shyǵarylymyn ánshiniń ómiri men shyǵarmashylyǵyna arnaýdy jón sanadyq.

Dinmuhammed Qudaıbergen 1994 jyly 24 mamyrda Aqtóbede elge tanymal ánshiler Qanat pen Svetlana Aıtbaevtardyń otbasynda dúnıege kelgen. Dımashtyń ózinen jasy kishi Raýshan esimdi qaryndasy men Ábilmansur esimdi inisi bar.

Dımashtyń ata-ájesi de mýzykaǵa jaqyn jandar. Biri dombyrada oınasa, ekinshisiniń án aıtýǵa beıimi mol. Kishkene kúninen ata-ájesiniń baýyrynda ósip, úlkenderdiń tárbıesin kórip ósken. Qazaqy salt-dástúrdi dáriptep, qurmet tutady. Óz ata-anasyn «aǵa, apa» dep ataıdy.

5 jasynan bastap fortepıanoda oınaýdy úırengen. Balalar horynda án aıtqan.

Dımash «Aınalaıyn», «Baldáýren», Astanada ótken «Jas Qanat» jáne basqa da halyqaralyq mýzykalyq baıqaýlarǵa qatysqan. Ár baıqaýda Dımashtyń daryny joǵary baǵalanatyn.

2014 jyly Dımash Ahmet Jubanov atyndaǵy mýzykalyq kolejde akademıalyq án oryndaý synybyn támamdady. Dımash Qazaq Ulttyq óner ýnıversıtetin «Estrada vokaly» mamandyǵy boıynsha bitirip shyqty.

Ánshi ári sazger Dımash Qudaıbergen keminde bes mýzykalyq aspapty meńgergen. Eń aldymen, ózimizdiń ulttyq aspabymyz – dombyrany jetik meńgergen. 

Mýltıınstrýmentalıst retinde de óte talantty mýzykant jeke barabanda, sonymen qatar fortepıanoda súıemeldeıdi.

Tipti sońǵy konsertterinde gıtara men ksılofondy da tartyp, kóptiń kóńilinen shyǵyp júr.

Ánshiniń baǵyn ashqan baıqaý

Dımash bala kezinen túrli án baıqaýlarynda baǵyn synap, júldeli oryndardy ıelene bastady. Ónerli jastyń baǵyn ashqan baıqaý - Vıtebskte ótken «Slaván bazary-2015» halyqaralyq án dodasy bolatyn. Dımash sol konkýrsta bas júlde ıelendi.

Dımash esimin álemge áıgilegen joba

«Slaván» bazarynan» keıin ol kezdegi jas oryndaýshy Dımash bir jyldaı Qytaıda ótken «I am singer» jobasyna qatysyp, talantymen mıllıardtar elin tańǵaldyrǵan edi. Sóıtip, 2017 jyly Dımash qytaılyq jobada ekinshi oryn aldy.

Osy jeńisinen keıin Dımash Fransıanyń tanymal baǵdarlamasyna qurmetti qonaq retinde shaqyryldy. Otandasymyz álem juldyzdarymen bir sahnada óner kórsetip, fransýzdardy tánti etti.

Dımashtyń konsertteri

Dımash alǵashqy álemdik týrnesi aıasynda Qytaıdyń birneshe qalasyn aralady. Al 2017 jyldyń jazynda Astanada alǵashqy úlken konsertin berdi. Shyǵarmashylyq keshke qazaqstandyqtardan bólek, Qytaı, Italıa, Reseı, Ýkraına, AQSH jáne Fransıadan tyńdarmandar keldi. «Astana-Arena» sport keshenine bas-aıaǵy 30 myńdaı kórermen jınalǵan.

Sondaı-aq, Dımash MTV Music Awards júldesiniń ıegeri, «Azıanyń eń tanymal ánshisi», «Halyqaralyq deńgeıdegi eń tanymal ánshi», «Jyldyń eń úzdik ánshisi» nomınasıalarynyń jeńimpazy. Búginde álemniń túkpir-túkpirinde Dımashtyń mıllıardtaǵan tyńdarmany bar.

2019 jyldyń 22 naýryzynda Reseı astanasyndaǵy Memlekettik Kreml saraıynda Dımashtyń «D-Dynasty» atty alǵashqy jeke konserti ótti.  Dımashtyń Máskeýdegi konsertine jankúıerleri 57 elden keldi. Ánshi óz jankúıerlerin «Screaming» ánimen qarsy aldy. Sondaı-aq ártis dombyrada oınap, túrli tilderde birneshe án oryndady. Kórermender onyń ár ánin birge qosylyp aıtýǵa tyrysty.

Ánshiniń Máskeýdegi ekinshi jeke konserti 2020 jyly «Megasport» sport saraıynda ótti. Dımashtyń aıtýynsha, syıymdylyǵy 10 myń adam bolatyn mýzykalyq alańda osyndaı úlken aýdıtorıany jınaý onyń armanynyń biri edi.

Ártis kórermenderdi qazaq, fransýz, aǵylshyn jáne orys tilderinde án salýmen qýantty. Máskeýdegi ekinshi jeke konsertte «S. O. S.», «Give Me Your Love», «Screaming», «Mahabbat ber maǵan» jáne taǵy da basqa ánder shyrqaldy.

Qonaq retinde shaqyrylǵan ánshi Tokıoda ABU Song Festival festıvalinde óner kórsetti. 

Dımash Mıshel Berje men Lúk Plýmondonnyń áıgili «SOS d’ un terrien en detresse» ánin oryndady.

Konsert júrgizýshileriniń ártiske qoıǵan saýaldaryna qazaq tilinde jaýap bergen bolatyn.

Eýropadaǵy alǵashqy konsert

Londonda óner kórsetý Dımashtyń mansabynda úlken mańyzǵa ıe boldy. Bul onyń Batys Eýropadaǵy alǵashqy jeke konserti boldy. Mýzykant óner kórsetken konsert zaly úsh myńǵa jýyq kórermendi qabyldaıtyn Indıgo zaly dep atalady.

Kórermenderdiń pikirinshe, ánshiniń Londondaǵy konsertine eń adal jankúıerler keldi – Dears súıikti ártistiń eýropalyq debútin álemniń 40 elinen qoldaýǵa keldi.

Nú-Iorktegi konsert

2019 jyldyń 10 jeltoqsany ánshiniń de, onyń kóptegen jankúıerleriniń de esinde qaldy. Bul kúni ol komandamen birge Nú-Iorkte úlken jeke konsert ótkizdi. Shoý áıgili Barclays Center alańynda ótti. Keıinirek ol aıtqandaı, bul umytylmas sát boldy.

Konsert úsh saǵattan astam ýaqytqa sozyldy. Bul joly Dears 60 el men Amerıkanyń 45 shtatynan keldi. Dımashtyń Nú-Iorkte óner kórsetýine 7 myń bılet bir aı buryn satyldy, olardyń 80% -ǵa jýyǵyn amerıkalyq aýdıtorıa satyp aldy.

Uıymdastyrýshylarǵa Qazaqstandyqtardyń shyǵarmashylyǵyn baǵalaý úshin jankúıerlerdiń barynsha kóp bolýy úshin taǵy 2 myń oryn qosýǵa týra keldi. Arnau tour ENVOY shoýy QR Mádenıet jáne sport mınıstrliginiń qatysýymen ótti jáne Qazaqstannyń Amerıka Qurama Shtattardaǵy mádenıet kúnderiniń mańyzdy bóligi boldy.

Búkil óner kórsetý barysynda Dımash qazaq mádenıetiniń rýhyn daýys, dekorasıa jáne kórneki áserler arqyly túrli tásildermen jetkizdi. Nú-Iorkte ol qazaq, orys, aǵylshyn jáne qytaı tilderinde án aıtty. 

2020 jyldyń 16 aqpanynda Krasnodarda Dımashtyń Arnau Tour 2020 atty aýqymdy gastróldik sapary bastaldy. Osy baǵdarlamamen ol Qazanda (20 aqpan), Ekaterınbýrgte (23 aqpan), Latvıa astanasy Rıgada (7 naýryz), Máskeýde (9 naýryz) jáne Kıevte óner kórsetken bolatyn.

Qazaqstandyq ártistiń Ekaterınbýrgtegi konserti «Ekaterınbýrg-Ekspo» alańynda ótti. 5 myń adamǵa arnalǵan zalda taǵy da sold-aýt boldy.

Dımashtyń Kıevtegi konserti álemniń túkpir-túkpirinen taǵy da tyńdarmandardy jınady. Oryndaýshyny tyńdap, kórýge 25 elden kórermen jınaldy.

Dımashtyń Dimash DIGITAL SHOW onlaın-konserti

Ánshiniń 2021 jylǵy alǵashqy onlaın-konserti Dears jahandyq qoǵamdastyǵy úshin umytylmas jáne kópten kútken syılyq boldy. 16 qańtardan bastap myńdaǵan kórermender amerıkandyq Tixr.com. aǵyndy platformasynda arnaıy onlaın-shoýdyń kýási boldy.

Konsert Nur-Sultan qalasynyń ýaqytymen 20:00-de bastalyp, júzden astam elde ótti. Keıinirek tixr qyzmetkerleri túsindirgendeı, DIMASH DIGITAL SHOW kórermenderi sheteldik oryndaýshynyń konsertine bıletter satý boıynsha rekord ornatty.

Dımash Qudaıbergenniń ózi ánin jazǵan týyndylar: 2014 jyly – «Kórkemim», 2015 jyly – «Umytylmas kún», 2017 jyly – «Sálem», «Tátti eles», «Sóz sońy», «Soǵys jáne beıbitshilik» (戰爭與和平),2018 jyly – «Ókinish», 2019 - «Give Me Your Love», «Stand Up», «Ákeshim-anashym».

Jigitke jeti óner de az

 Bulaı deýimizge sebep te joq emes. Kásibı mýyzkant Dımash sportpen de biraz jyl kásibı túrde aınalysqan eken. Jasóspirim kezinde 3-4 jyldaı taekvandoǵa qatysqan, atalǵan sport túrinen qyzyl belbeýi bar. Keıinnen ýaqyt tapshylyǵy men densaýlyǵyna baılanysty bul sportty qoıyp ketken.

Vokal degen – kádimgi sport

Dımash úzbeı shuǵyldanǵan sport túrleriniń biri – júzý. Qatarynan bes jyl boıy turaqty túrde júzýge barǵan. Onyń asa joǵary daýys oktavasyn erkin ala alýynyń ózi osy sportpen aınalysqanynyń bir kórinisi ári jemisi deýge bolady. Suhbattarynyń birinde ánshi: «Júzýdi óte qatty jaqsy kóretin edim. Áli kúnge deıin qaı eldiń qonaq úıinde bolsam da, baseınge baryp, ózimdi shynyqtyryp turýǵa tyrysamyn. Óıtkeni vokal degen – kádimgi sport. Ol – taza matematıka», - deı kele, juldyz óziniń ómirine sporttyń qalaı oń áser etkenin ańǵartty.

Dımashtyń oryndaýyndaǵy ánder

Dımashtyń oryndaýyndaǵy árbir án, mýzyka asa joǵary talǵammen jazylady, oryndalady. Oǵan búginde  álemniń túkpir-túkpirinen aıtylyp, jazylyp jatatyn mılııardtaǵan tyńdarman yqylasynan kórýge bolady. «Qulaqtan kirip boıdy alar» degen sóz tekke aıtylmasa kerek. Dımashtyń ánderin súıip tyńdaıtyndar mýyzkany tyńdap bolǵansha, bastan túrli kúı keshkendeı sezimde bolatyndaryn jıi aıtady. Boıdy shymyrlatyp, júrekti eljiretedi.

Dımash Qudaıbergenniń oryndaýyndaǵy... degende oıǵa birden keletin týyndylardyń biri – halyq áni «Daıdıdaý». Bul án burynnan halyq arasynda keńinen tanymal. Deıturǵanmen, halyq fólkloryna jatatyn osyndaı ánniń kúlli álemge tanylýyna Dımashtaı ánshiniń úlesi qanshalyqty ekeni aıpasa da belgili. Sebebi ánshiniń atyn jalpy álem tanı bastaǵan jyldary «Daıdıdaý» álemdik radıo júıesine engizildi. Sol kezde ándi halyqaralyq radıo júıesindegi júzdegen eldiń turǵyndary tyńdaı alatyn múmkindikke ıe boldy. halyqaralyq radıo ókilderi «Qazaq» radıosyna usynyspen shyǵyp, qazaq halqynyń ulttyq bolmysyn kórsetetin án suraǵan.

Dımash baǵyn ashqan taǵy bir halyq ániniń biri – «Samaltaý».  Bul ándi ol Qytaıdyń Fýchjoý qalasynda ótken VI halyqaralyq «Jibek joly» kınofestıvaliniń jabylý saltanatynda oryndady.

Burynnan halyq arasynda tanylǵan án bolǵanmen, halyqaralyq arenada bul ándi tanytqan Dımash bolyp sanalady. Ánge zamanaýı óńdeý jasalyp, qobyzben súıemeldengen. Jeli qoldanýshylary Dımash Qudaıbergenniń oryndaýyna da, «Samaltaý» ánine de tánti bolǵany buǵan deıin talaı aıtylyp, jazyldy.

Erekshe daýys ıesi

Dımashtyń daýysy týraly aıtar bolsaq, tabıǵı dıapazony óte keń jáne onyń daýysy onyń bir túrimen ǵana shektelmeıdi, sonymen qatar dástúrli klassıfıkasıaǵa da jatpaıdy. Dımashty akademıalyq emes, biraq estradalyq baǵytta «birneshe daýystyń» ıesi dep aıta alamyz jáne barlyq regıstrlerde (tómengi, orta jáne joǵarǵy) «bir» daýyspen án aıtatyn «dástúrli ánshige» de uqsamaıdy, sodan keıin Dımash ártúrli regıstrlerde ártúrli daýysta: tómende estradalyq barıton, sodan keıin tenorǵa aınalady, al joǵarǵy daýysqa jetkende ashyq soprano falsetto (kontratenordyń naq ózi), sondaı-aq aralas jáne ysqyryq ta bar ǵajaıyp daýys ıesi.

Dımashty naqty jáne naqty daýystyń aıasyna syıǵyzý  múmkin emes, ony «tek» tenor, barıton nemese kontratenor dep aıtýǵa bolmaıdy. Onyń daýsynda «ártúrli» daýystardan «ártúrli» qasıetter bar – jáne osy qyry ony basqalardan erekshelep turady .  Eger dástúrli ánshi barlyq regıstrlerde «bir» daýyspen án aıtsa, Dımash ártúrli regıstrlerde ártúrli daýyspen án salady. Sonyń nátıjesinde Dımashtyń daýsy tabıǵattyń sırek syıy, sonymen qatar úlken eńbek pen tynymsyz eńbektiń jemisi dep aıta alamyz.

Álem juldyzy - Dımash basqa juldyzdarmen

Dımash pen Djekı Chan burynnan jaqsy tanys. Qazaq ánshisi Qytaıda ótken I am Singer jobasynda mıllıondaǵan qaýymnyń júregin jaýlaǵan bolatyn. Sonda áıgili aktermen kezdesip, ıyǵyna qazaqtyń shapanyn jaýyp, qońyr úndi dombyrasyn da syıǵa tartqan edi.

Dımash Qudaıbergen Máskeý sahnasynda «Ti amo cosi» ánin Lara Fabıanmen birge oryndady.

Týǵan kúninde – jańa beınebaıan

Dımash Qudaıbergen  24 mamyr, ıaǵnı búgin  YouTube arnasynda jańa beınebaıannyń tusaýy kesiletinin jetkizdi.

Ómir - aq pen qara almasqan, baq pen nala arbasqan, qýanysh pen qaıǵy talasqan, teńdessiz alyp keme. Aıdyndaǵy surapyl tolqynǵa da, daýylǵa da tótep berýime túrtki bolyp júrgen barsha tyńdarmanyma týǵan kúnimniń qarsańynda shyǵatyn, alǵash ret áýeni men sózi jan dúnıemdi jaryp shyqqan shyǵarma. Bul týyndy meniń ómirim jaıynda»,- dep jazdy ánshi áleýmettik jelidegi paraqshasynda.

Búgin Dımash Qudaıbergen 29-ǵa keldi.

Erekshe daýysymen tek qazaq halqyn ǵana emes búkil álemdi áldılegen birtýar uldyń tarıhta esimi qalary anyq. Osy kezde deıin el atyn tanytýda ánshiniń jasaǵan eńbegi az emes, degenmen alda áli de talaı baǵyndyrar, qazaqtyń osyndaı erekshe týǵan balasy  baryn moıyndatar degen senim mol.

Dımash Qudaıbergenge uzaq ǵumyr men shyǵarmashylyq tabys tileı otyra, mańdaıyndaǵy juldyzy kúlli álemge jarqyraı bersin degimiz keledi.