Erekshe tegi bar qazaqtyń taǵy bir talantty balasy – Erjan Maqsym.
Búginde Erjan Maqsym esimi elge keńinen málim, kópshilikke, ásirese, mýzykaǵa bir taban jaqyn jandarǵa jaqsy tanys bolar. «Bizdiń maqtanyshymyz» shyǵarylymynyń bul jolǵy sanyn ereshe daýys ıeleriniń biri, kúshti daýys ıesi Maqsym Erjanǵa arnaýdy jón sanadyq.
Balalyq shaǵy
Erjan 2007 jyly 1 qańtarda elimizdiń Oral qalasynda dúnıege kelgen. Ulty – qazaq. Tegine qarap, «ulty taza qazaq pa?» degen suraqtar kóp qoıylsa kerek. Erjannyń óziniń aıtýynsha, onyń atasynyń aty Maqsym bolǵan. Alaıda qujatta Maksım bolyp jazylyp ketipti.
Erjan otbasynda eki ápkesinen keıingi kenjesi. 3-4 jasynan beri án aıta bastaǵan, uldarynyń ánge degen qabiletin baıqaǵan ata-anasy ony bes jasynan bastap, vokalǵa bergen. 9 jasynan bastap Oraldaǵy jergilikti mýzykalyq mekteptiń fortepıano synybyna qabyldanypty.
Tabıǵatynan ashyq, elgezek Erjan sportty da erekshe jaqsy kóredi eken. Ol rolıkti kónkı tepkendi, sonymen birge fýtbol oınaýǵa da jany qumar.
Sahna, mýzyka
Kez kelgen ánshiniń baǵy sahnada ashylady, sahnada juldyzy janady, sahna arqyly tanylady. Erjan vokalǵa uzaq ýaqyt qatysqan, daýsyn qoıýǵa arnalǵan arnaıy jattyǵýlardy da jasap júrgen. Deıturǵanmen, bastapqyda sahnaǵa shyǵar aldynda bala Erjan qobaljyǵannan jıi jylasa kerek. Ýaqyt óte kele, bul qorqynyshyn jeńgen Erjan Maqsym qazirgi tańda kórermen aldynda ózin erkin ustaıtyn, ózine, bastysy, óz daýysyna senetin mýzykantqa aınaldy.
Kóptegen mýzykalyq baıqaýlarǵa qatysyp júrgen Erjan halyqaralyq arenadaǵy alǵashqy jetistikterine 9 jasynda qol jetkizdi. Jas daryn 2016 jyly Grýzıanyń Batýmı qalasynda ótken «Delfın Fest» án baıqaýyna qatysyp, bas júldeni ıelendi. Dál sol jyly Latvıada sol baıqaýǵa uqsas konkýrsta da baǵyn synap kórdi. Onda ol birden birneshe atalym boıynsha qatysyp, 2 altyn men 1 kúmis júldeni ıelendi.
2017 jyly jas oryndaýshy ózin Italıada ótken San Remo Junior baıqaýynda tanytty. Bul jerde ol fınalǵa ótip, sımfonıalyq orkestrdiń súıemeldeýimen jandy daýysta án oryndady. Jas ónerpazdyń bul oryndaýy kórermenderdi tań qaldyryp, kóptiń esinde qaldy.
Kóp uzamaı, Erjan Vıtebskte «Slaván bazaryna» qatysyp, ekinshi orynnan kórindi. Erjannyń ata-anasy Gúlmıra Álibek pen Erbol Naýmov uldarynyń talatyn tanytyp, ánin shyńdaý úshin qoldarynan kelgenin aıamaı keledi.
Erjan Maqsymnyń ánshilik kareerasynda mańyzdy kezeńderdiń biri – «Balalar Evrovıdenıesi -2018» baıqaýy boldy. Bul saıystyń irikteý kezeńderine Qazaqstannyń túkpir-túkpirinen kóptegen bala qatysty. Biraq ulttyq irikteýge on qatysýshy ǵana ótti. Solardyń qatarynda Erjan Maksım da boldy. Án baıqaýynda Erjannyń birinshi oryn alýyna upaıy jetpeı qalǵanmen, bul saıys ol onyń basqa jobalarǵa qatysýyna jol ashty.
Erjannyń atyn shyǵarǵan shoý
2019 jyly Erjan Maqsym Reseıdiń Birinshi arnasynyń «Golos.Detı» shoýynyń 6-shy maýsymyna qatysty. Oqýshy federaldyq arnada óner kórsetý týraly sheshimin óziniń talantyn kórsetip, álemdi moıyndatý nıetimen túsindirdi.
Bul onyń kishkentaı kezinen armany edi, biraq ata-anasy uly qajetti tájirıbe jınady-aý degen kezde olar ony sol shoýǵa qatystyrýǵa ótinish berýine ruqsat berdi.
Baıqaýdyń «Kórmeı tyńdaý» dep atalatyn 1-kezeńi úshin Erjan Andrea Bochellıdiń «Ama credi e vai» ánin tańdaǵan bolatyn. Sol kúni jas oryndaýshylarǵa tórelik etetin tálimgerler qatarynda Pelageıa, Svetlana Loboda jáne Valerıı Meladze boldy. Tórelik aıtqan ataqty mýzykanttar Erjannyń oryndaýyn joǵary baǵalap, ónerine erekshe tánti bolyp jatty. Bul kezeńnen ótken bala ánshi Valerıı Meladzeni ózine tálimger retinde tańdady.
Daýystyń kúshtilinen stakan synyp ketken
Án baıqaýynyń ekinshi kezeńinde qatysýshylar trıoǵa biriktirilip, tálimger tańdaǵan ándi oryndaý qajet boldy. Bul synda Erjanmen birge Ivan Starıkov pen Islam Balkoev esimdi qatysýshylar bir topta óner kórsetti. Jas balalar Músilim Magomaevtyń «Sınáá vechnost ánin oryndady. Bizdiń eldiń namysyn qorǵaǵan Erjan Maqsymnyń óz partıasyn minsiz oryndaǵany sondaı, dırıjerdiń janynda turǵyn stakan shynysy shytynap ketken edi. Mundaı qubylysty Erjannyń daýysynyń kúshtiliginen dep baǵa berilip jatty sol kezde. Oqýshynyń ónerine tánti bolǵandar sol sátte birazǵa deıin qoshemet kórsetip,uzaq ýaqyt boıy qol soǵyp turdy. Kórermenniń ystyq yqylasynan-aq bul synda kimniń ozyq shyqqany belgili edi. Baıqaýdy ary qaraı jalǵastyratyn qatysýshyny anyqtaý kezinde tańdaý birden qazaq balasy Erjanǵa tústi. Baıqaý qorytyndysynda Erjan Maqsym ekinshi orynǵa ıe boldy.
Qalaı degenmen Erjannyń keńinen tanymal bolýy dál osy baıqaýdan bastalǵan edi.
Qazaqtyń baǵyna bitken bala
Erjan Maqsymnyń ónerdegi aǵasy, qoldaýshysy, búginde esimi álemge áıgili Dımash Qudaıbergen «Golos. Detı» shoýynyń sýper fınalyna shyǵyp, jeńiske bir taban jaqyn qalǵan Erjan týraly óz pikirin bildirgen bolatyn.
«Baýyrsaq bala! Seniń fınalda kórsetken ónerińdi tamashalap shyqtym. Qazaǵymnyń baǵyna bitken balasyń. Jeńisiń qutty bolsyn, Erjantaı! Alar asýlaryń kóp bolsyn. 100 mıllıonnan astam halyqtyń arasynan 2 - oryn alý degen óte úlken jetistik. Birinshi oryndy qyz balaǵa jigittik tanytyp bere salǵanyń da durys boldy. Naǵyz djentelmen sondaı bolady! Barlyq qatysqan búldirshinderdi quttyqtaımyn. Biraq men úshin Erjantaı jeńimpaz!» – dep jazǵan bolatyn sol kezde Dımash Instagram jelisindegi paraqshasyna.
Erjannyń ónerine budan asqan baǵa bar ma?! Erjannyń ózi de Dımash aǵasyn ózine úlgi tutyp, álemdik juldyzǵa qarap, boı túzep keledi.
Qyzyl kilem, syıly qonaq
Dımash Qudaıbergen men Erjan Maqsym 2019 jyly «Mýz-TV 2019» keshine arnaıy shaqyrylǵan bolatyn. Mýzykalyq sharada Erjan Maksım «All by myself» ánin áýelete shyrqap, zaldyń úlken qoldaýyna ıe boldy.
Dımash Qudaıbergen men Erjan Maqsym «MÝZ-TV» syılyǵyna arnalǵan saltanattyń qyzyl kilemimen júrip ótip, el mereıin taǵy bir asqaqtatqan bolatyn.
2019 jyly Erjan taǵy bir baıqaýda baq synady («Pesná na vylet»). Bul konkýrsta da jas ánshi Bochellıdiń «Ama credi e vai» ánin qaıta oryndap, birden fınalǵa ótti. Biraq jarys qorytyndysy boıynsha, reseılik ánshi Alsýdyń qyzy jeńiske jetti.
WAF CONTEST – bas júlde
Bıylǵy jyldyń basynda qazaqstandyq jas ánshi Erjan Maqsym Makedonıa astanasy Skope qalasynda ótken WAF CONTEST halyqaralyq baıqaýynyń bas júldesin jeńip aldy.
Bir aıta ketetini, qazir jas ánshi Qazaq ulttyq óner ýnıversıteti mektebiniń estradalyq vokal boıynsha 9-synybynda oqıdy.
Erjan Maqsym sonymen qatar jyl saıynǵy WAF AWARDS júldesine ıe boldy.
Ýnıversıtet málimeti boıynsha, bul eki jarysty Dúnıejúzilik festıváldar qaýymdastyǵy ótkizedi. WAF ótkizgen ár túrli baıqaýlardyń belsendi qatysýshylary jyl qorytyndysyna sáıkes marapattalady.
Bıylǵy jyly WAF CONTEST baıqaýynda Eýropa jáne Azıanyń 16 memleketinen, sonyń ishinde Qazaqstannan 32 qatysýshy baq synady.
Olardyń arasynan Erjan Maqsym baıqaýdyń Gran-prı ıegeri atandy. Ol óziniń jeńisin Qazaqstanǵa, sondaı-aq Qazaq ulttyq óner ýnıversıtetine arnady. Bul ýnıversıtettiń bıyl toılanatyn 25 jyldyǵyna alǵashqy tartý boldy.
«Qazir Erjan 15 jasta. Onyń Oralda bastalǵan ánshilik joly osylaısha tabysty jalǵasýda», - deıdi Erjannyń anasy Gúlmıra Álibek.
Búginde Erjan alyp júrgen mýzykalyq biliminen bólek, ánshiligin shyńdap, án jazyp, otandyq shoý-baǵdarlamalarǵa qatysyp, baǵyn synap júr. Jas ta bolsa, osy jasyna deıin ánshiniń jetken jetistikteri az emes. Álemdik arenada Qazaqstan atyn shyǵarar jastardyń biri dep maqtanyshpen, zor senimmen aıtýǵa bolatyn osyndaı jastyrymyzdyń bary qýantady.