Otandyq İT sala qarqyndy damýda
Elimizdiń İT salasynda oń ózgeris kóp. Sońǵy ýaqyttary damýdyń dańǵyl jolyna bet burǵandaı. Jastar órenderdiń qyzyǵýshylyǵynda shek joq. Bastysy álemdi baǵyndyratyn qarakózderdiń shyǵatynyna senemiz.
Osy oraıda Almatylyq jas kásipker, TezText qosymshasyn oılap tabýshynyń biri Abaı Serǵazıevti suqbatqa tartqan edik.
– Abaı ózińizdi İT kompanıanyń basshysy ekenińizdi bilemiz, atalǵan salany tereń ıgermek úshin ne istemek kerek?
– Óte jaqsy suraq! Bizdiń baǵytymyz ǵalamtormen tikeleı baılanysty. Eń negizgisi qushtarlyq kerek shyǵar. Atalǵan qasıet bolsa qalǵany óz oryn tabady. Bizde stýdentter de, tipti 18 jas shamasyndaǵy jastar jumys atqtarady. Eger qabileti bolsa alyp ketedi. Meniń jasym 28-de. Jastaıymyzdan bizder kompúter, ınternetke jaqyn boldyq. Sonyń nátıjesiniń biri TezText qosymshasy degim keledi. Árbirimiz, nátıjeli ispen aınalysyp júrmiz dep sanaımyz.
– Álemde, Feısbýkti Mark Sýkerberg, Instagramdy Kevın Sıstrom oılap tapty. Tizimdi jáne jalǵastyrýǵa bolady. Olar mýltımıllıarderler qatarynda. Bolashaqta qazaq jastaryn jáne sizdi osylardyń qatarynan kórýimiz múmkin be?
– Árıne! Bári de múmkin. Negizinen alǵanda aýhattylyq pen baılyqty kózdemeımin. Bar bolǵany, súıiti ispen aınalysyp júrgender qataryna jatqyzamyn. Bul úshin aýyzbirshilik kerek. Óıtkeni jumystyń yńǵaıy solaı. Bir adamnyń qajyr-qaıratyna barlyq tirlikke kelmeıdi. Ágárákı, árkim óz jumysyn tyńǵylyqty atqarsa, ilgeri jyljý degen sol der edim.
– Qazaq tildi kontent kenje damýda, bul turǵydaǵy oılaryńyzben bólisseńiz?
– Iá, ol da bar. Biraq sońǵy ýaqyttary qazaqsha ǵalamtordy paıdalaný keń óris alyp keledi. Bizdiń jastarymyzdyń sóıleý daǵdysy kóp qazaqshalandy. Burynǵymen salystyrǵanda alǵa jyljý baıqalady. Sol sebepti de qazaqy aýdotıráǵa arnap múltfılm aýdaryp, balalar oıyndaryn jasaý oıda tur. Nege Japonıanyń «Narýtosy» sıaqty shyǵarmaımyz?! Osyny qolǵa alý kerek. Úlken ıdeologıamen jasalǵan, salt-dástúr, qundylyqtar turǵysynan alǵan da bizge jaqyn. Osyndaı ıgi qundylyqtardy qajetimizge asyrǵan jón. Ibn Sına, jalpy ilimdar adamdar Orta Azıadan taraıdy. Ǵalym, bilimniń shamshyraqtarynyń eńbegin tárjimalaǵan abzal. Bir sózben aıtqanda, Deshti-Qypshaq, túrkilerden nebir uly oıshyldar shyqqan.
– Shet eldi baǵyndyrý nemese sonda qonys aýdarý oıda bar ma?
– Bizder týǵan jerdiń ulandarymyz. Qazaq jeri barshamyzdyń ystyq otanymyz. Shet elge baryp ta, onda ómir súrýge de bolady. Onsyz da shetel naryǵyndamyz. Degenmen, aǵaıyn-týys, ata-ana baýyrlarymyz osynda. Olardan qol úzip ketýge bolmaıdy. Áıtpese, árbirimizdiń syr elde isteýge qaýqarymyz ben bilimimiz jetedi. Sondaı-aq, Alash qaıratkerleri Álıhan Bókeıhan, Ahmet Baıtursynuly sıaqty t.b alyptar eli úshin qyzmet atqardy. Aldyńǵy býynnyń jolyn jalǵaý árbirimizge paryz bolmaq. Qysqasha aıtqanda, báribir týǵan ólkeniń qadiri bir bólek demekpiz.
– Áńgimeńizge raqmet!