Qyzylordadaǵy Qorqyt Ata atyndaǵy ýnıversıtettiń ǵalymdary Eýropalyq Odaq grantyn jeńip alyp, sheteldik áriptesterimen birge dári jasaýǵa qatysady.
Qazaqstandyq ǵalymdar Alsgeımer jáne Parkınson aýrýlaryna qarsy dári jasap jatyr, dep habarlaıdy Almaty-akshamy.kz
QR Bilim jáne ǵylym mınıstrliginiń málimetinshe, elimizdiń ǵalymdary Portýgalıa, Nıderlandy, Danıa, Reseı, Belarýs jáne Ýkraına ǵalymdarymen birlesip, ázirleýshiler tobyna kirdi.
Dárilik preparatty daıyndaý úshin Qazaqstannyń ońtústik aımaqtarynda ósetin túıe tikenegi paıdalanylady. Otandyq zertteýshiler ósimdikten aterosklerozdyń bastapqy formalaryn emdeýde tıimdi bıologıalyq belsendi zattardy aldy.
«Biz dárilik ósimdik – túıe tikenegine zertteý júrgizý úshin Bilim jáne ǵylym mınıstrligi Ǵylym komıtetiniń grantyn aldyq. Sodan keıin biz onyń qundy qasıetterin anyqtadyq. Biz ózimiz ashqan jańalyqty Portýgalıada tanystyrdyq. Olar bizdiń ǵylymı ázirlemelerimizge qyzyǵýshylyq tanytyp, yntymaqtastyq usyndy. Jobany oryndaý kezinde flavonoıdtardyń sýda erıtin formalaryn alamyz, olardy kómirtekti nanomaterıaldarmen modıfıkasıalaımyz. Sheteldik ǵalymdar jedel test ótkizip, biz anyqtaǵan nanomaterıaldar Alsgeımer jáne Parkınson aýrýlarynyń damýyna kedergi keltiretinin jáne pasıentterdi aýrýdyń alǵashqy kezeńderinde emdeýge kómektesetinin rastady. Sonymen qatar túıe tikeneginen alynǵan modıfıkasıalanǵan bıologıalyq belsendi zattardyń janama áserleri joq jáne adam densaýlyǵy úshin qaýipsiz bolyp tanyldy», – dedi Qorqyt Ata atyndaǵy Qyzylorda ýnıversıtetiniń zertteýshi-professory Nurbol Appazov.