Olar bizdiń aramyzda bar. Qazaqstan TJM qutqarýshylary - zamanymyzdyń naǵyz batyrlary. Olar kádimgi, qarapaıym adamdar, ekstremaldy jaǵdaılarda áreket ete otyryp, óz ómirin oılamaı, bireýdiń ómirin qutqarady.
Aǵa órt sóndirýshi-qutqarýshy Artýr Berdashev azamattyq qorǵaý organdarynda 2016 jyldan beri qyzmet etedi. Onyń kásibıligi men erliginiń jarqyn mysaly - 2023 jylǵy 17 qazanda Oralda júrgizilgen qutqarý operasıasy.
Sol kúni bes qabatty turǵyn úıdiń páterinde órt shyqty. Oqıǵa ornyna kelgen órt sóndirýshiler besinshi qabatta qatty tútin men ashyq janýdy baıqady. Onyń ishinde jas balalar bar ekeni anyqtaldy. Serjant Berdashev janyp jatqan páterge kirip, eki balany taýyp, qaýipsiz aımaqqa alyp shyqty.
Úılesimdi jumys pen jeke quramnyń, onyń ishinde aǵa órt sóndirýshi-qutqarýshy Artýr Berdashevtyń batyl áreketteriniń arqasynda 15 adam, onyń ishinde 5 bala qaýipsiz jerge kóshirildi. Órt kórshi páterlerge taralýyna jol bermeı, jedel sóndirildi.
Batyrlyǵy úshin Qazaqstan Respýblıkasy Prezıdentiniń Jarlyǵymen Batys Qazaqstan oblysy «Órt sóndirý jáne avarıalyq-qutqarý jumystary qyzmeti» RMM № 1 mamandandyrylǵan órt sóndirý bóliminiń aǵa órt sóndirýshi-qutqarýshysy azamattyq qorǵaý serjanty Artýr Berdashev «Erligi úshin» medalin aldy. Artýrdyń kásibıligi, tabandylyǵy men batyldyǵy batyrlyqtyń úlgisi, moıyndaýǵa jáne qurmetke laıyq.
Suńǵat Júzbolsyn - mańǵystaýlyq qutqarýshy, azamattyq qorǵaý organdary júıesinde 2019 jyldyń mamyrynan bastap jumys isteıdi.
Ótken jyly Batys Qazaqstan oblysyndaǵy sý tasqyny kezinde qutqarýshylar tabıǵı apattyń saldaryn joıýǵa, sýdy buǵattaýǵa, halyqty evakýasıalaýǵa jáne jaǵalaýdy nyǵaıtýǵa kiristi.
Suńǵat órt sóndirýshi-qutqarýshylar tobynyń quramynda Jaıyq ózeniniń jaǵalaýyn bekitý jáne bógendi nyǵaıtý jumystaryna belsene qatysty. 22 mamyrda ol joldastarymen Jalǵansaı aýylyna kireberiste túngi kezekshilikte boldy.
Tún ortasynda bógen jaryldy. Qaýiptiń aýqymyn sezingen Suńǵat jedel shtabpen baılanysqa shyqty, sodan keıin qutqarýshylar oqıǵa týraly ákimdikke habarlady. Qysqa merzim ishinde halyqty evakýasıalaý uıymdastyrylyp, bógendi qalpyna keltirý jumystary bastaldy. Qutqarýshylardyń úılesimdi áreketteri men batyldyǵynyń arqasynda bógen qalpyna keltirildi, turǵyndar qaýipsiz jerde boldy. Suńǵattyń tótenshe jaǵdaıdaǵy áreketin batyl dep aıtýǵa bolady: ol adam ómirin qutqaryp, eldi mekenniń ornyqtylyǵyn qamtamasyz etip, batyl ári jan-tánimen áreket etti.
Azamattyq qorǵaý júıesinde 20 jyldaı qyzmet etip kele jatqan azamattyq qorǵaý podpolkovnıgi Ertaı Qurmanbekuly Raıymbekov kún saıyn óz isine adaldyǵyn dáleldep keledi.
Onyń qaısarlyǵynyń jarqyn mysaldarynyń biri 2023 jylǵy 20 qańtarda Tarazdaǵy «Aqsaı» bazarynda qutqarý operasıasy. Órt kezinde qara tútin aınalany basyp, temperatýra qaýipti deńgeıge kóterilgende Ertaı gaz-tútinnen qorǵaý qyzmetiniń býynyn basqardy. Óz ómirin qaýip-qaterge tigip, ol jáne onyń komandasy janyp jatqan ǵımaratqa kirdi. Jalynnan Ertaı eki áıeldi ózi alyp shyǵyp, shyǵa almaıtyn jerde qalǵan múmkindigi shekteýli adamdy qutqaryp qaldy. Sonymen qatar 2024 jyly ol Aqmola oblysyndaǵy sý tasqyny kezinde qutqarý operasıasyna qatysty.
Sol kezde onyń basshylyǵymen 200-den astam adam evakýasıalanyp, sýǵa batqan avtokóliktiń júrgizýshisi qutqaryldy. Muzdaı sýǵa jáne densaýlyǵyna qaýip tóngenine qaramastan, Ertaı beıtanys adamnyń ómirin saqtap qalý úshin sýǵa ózi sekirdi. Bul onyń batyldyǵynyń taǵy bir dáleli boldy.
Qyzmettik mindetterin atqarý jáne adam ómirin qutqarý kezinde kórsetken erligi úshin azamattyq qorǵaý podpolkovnıgi Ertaı Qurmanbekuly Raıymbekov Baýyrjan Momyshuly atyndaǵy İİ dárejeli «Aıbyn» ordenimen marapattaldy.
«Bizdiń mamandyǵymyz ár mınýtty baǵalaýǵa jáne jyldam áreket etýge úıretedi, óıtkeni ár sekýnd - bireýdiń ómiri», - deıdi podpolkovnık Raıymbekov.
Bul oqıǵalar áriptesterimizdi ǵana emes, árqaısymyzdy shabyttandyratyn naǵyz erlik úlgisi.
Qutqarýshylardy qoldaý - adamdardyń qaýipsizdigi jolyndaǵy qajyrly eńbegin moıyndaýdyń belgisi. Olardyń arqasynda biz eń qaýipti jáne boljaýǵa kelmeıtin jaǵdaılarda da árqashan qutqarylýǵa múmkindik jáne jaqsylyqqa úmit bar ekenine senimdimiz.