Almaty qalasynyń terorızmge qarsy jedel shtaby azamattarǵa áýejaıda, ásirese ushý aldyndaǵy tekserý rásimderi men ushaqqa otyrǵyzý kezinde orynsyz ázilder men aıtylymdardyń jol berilmeıtinin eskertedi.
Jýyrda Almaty halyqaralyq áýejaıynda oqys oqıǵa oryn aldy, dep habarlaıdy aqshamnews.kz.
Jasóspirimderdiń biri qaljyńdap, dosynyń rúkzagynda jarylǵysh zat bar dep málimdegen. Nátıjesinde ushaq pen barlyq jolaýshylardy tekserý jospary iske qosylyp, reıs keshiktirilip, ýaqytsha ushý shekteýleri engizildi.
Mundaı sózder, tipti qaljyń retinde aıtylǵan kúnniń ózinde, qaýipsizdikke tóngen yqtımal qater retinde qabyldanyp, mindetti túrde tekseriledi, al keıbir jaǵdaılarda — Qazaqstan Respýblıkasynyń zańnamasyna sáıkes jaýapkershilikke ákep soǵýy múmkin.
Azamattardy jaýapkershilik tanytyp, tekserý aımaǵynda jáne ushaq bortynda qaýip-qater, qarý-jaraq, jarylǵysh zattar jáne basqa da qaýipti taqyryptarǵa qatysty sózder men tirkesterdi qoldanýdan bas tartýǵa shaqyramyz.
Mundaı «ázilder» orynsyz jáne saldary óte aýyr bolýy múmkin.
Osyny ósip kele jatqan jas urpaqqa túsindirý kerek jáne halyq kóp jınalatyn oryndarda minez-qulyqty basqara bilgen jón.