Ónerdi súıetin, ótkendi qadirleı biletin urpaq jamandyqtan aýlaq bolyp, jaqsylyq ataýlyǵa jaqyn júretini sózsiz.
Túrksib aýdanyndaǵy №59 mektep-gımnazıanyń oqýshylary muǵalimderimen birge bıyl 120 jyldyq mereıtoıy atalyp ótip jatqan sýretshi Ábilhan Qasteev esimin ılengen QR Memlekettik óner mýzeıinde boldy.
«Mýzeıdi betke alyp kele jatqanda balalardyń avtobýs ishin jastyqqa tán shat kúlkige bólep, tezirek jetsek eken dep yntyqqany qýantty. Júregi názik, ádemilikti kórýge asyq shákirt tárbıelep jatqanymyzǵa qýandym», – deıdi mektep-gımnazıanyń qazaq tili men ádebıeti páni muǵalimi Araılym Turǵazy.
Al óner ǵımaratynyń tabaldyryǵyn attaǵannan-aq oqýshylardyń kózi janyp, ár kartınaǵa úńile, syr izdep, tipti, bir-birimen talqylap jatty. Mýzeı qyzmetkeri Gúlnur Alpysbaıqyzy balalardy halyq sýretshisi Ábilhan Qasteevtiń ómir jolymen, biregeı týyndylarynyń tarıhymen tanystyrdy.
Mýzeıde Á.Qasteevtiń 300-den astam keskindemelik jáne grafıkalyq týyndysy bar. Oqýshylar qylqalam sheberiniń kartınalary arqyly qazaqtyń dástúrli ómir súrý saltymen, tynys-tirshiligimen, otbasy qundylyqtarymen tanysty.
«Ábilhan Qasteevtiń portret janrynyń naǵyz sheberi ekenine kóz jetkizdik. Qazaqtyń uly aqyny Abaıdyń beınesin kórgende, sýretshiniń tulǵanyń jan dúnıesine tereń úńile bilgenin sezingendeı boldyq. Sýretshi jasaǵan týǵan ólkeniń beınelerinen epıkalyq ulylyqty, panoramalyq keńdikti, lırıkalyq kúshti sezindik desek te bolady. Biz taǵy da oralamyz. Bul – balalardyń tilegi», – deıdi №59 mektep-gımnazıasynyń qazaq tili men ádebıeti páni muǵalimi Gúljan Ospanova.
Balalardyń mýzeıge jasaǵan bul ekskýrsıasy atalǵan bilim ordasyndaǵy qazaq tili men ádebıeti pánderi kafedrasynyń «Ult rýhanıatyndaǵy dara tulǵalar» atty onkúndik aıasynda «Mereıtoılar kerýeni» baǵyty boıynsha uıymdastyryldy.