Keshe álemde Halyqaralyq eskertkishter men tarıhı oryndardy qorǵaý kúni atap ótildi. Dúnıejúzilik mura kúni dep te atalatyn bul kúndi 1983 jyly IýNESKO-nyń eskertkishter men kórikti jerlerdi qorǵaý jónindegi Halyqaralyq keńestiń (ICOMOS) Assambleıasy belgiledi. Ol búkilálemdik mádenı murany qorǵaý jáne saqtaý máselelerine jurtshylyqtyń nazaryn aýdarý maqsatynda qurylǵan.
«Almaty – bizdiń ortaq úıimiz» ekologıalyq aksıasy aıasynda Halyqaralyq eskertkishter men tarıhı oryndar kúnine oraı, «Boraldaı saq qorǵandary» arheologıalyq parkiniń aýmaǵyna da 100 túp aǵash otyrǵyzyldy.
«Qalamyzda búgingi kúni memlekettiń qorǵaýyna alynǵan 161 tarıhı jáne mádenı qundylyǵy bar eskertkish ornalasqan. Onyń ishine arheologıalyq, arhıtektýralyq, monýmentaldy óner eskertkishteri kiredi. Búgin solardyń biri ári biregeıi "Boraldaı saq qorǵandarynda" Almaty qalasy mýzeıler birlestigi ujymy arheologıalyq park aýmaǵynda tazalyq jáne kógaldandyrý jumystaryn júrgizdi. Qalamyzdyń tazalyǵy, eń birinshi qala turǵyndary úshin kerek. Ár azamatymyz jáne óskeleń urpaq tarıhymyzdy bilý kerek. Tarıhymyzdy bilsek, bizdiń bolashaǵymyz jarqyn bolady. Árbir ulttyń bolmysyn ashatyn, sol ulttyń mádenıeti, salt-dástúri jáne ádet-ǵurypy. Tarıhymyzdy bilip, salt-dástúrimizdi qurmetteıik», – deıdi Almaty qalasy mýzeıler birlestiginiń dırektory Lázzat Saǵyndyqova.
Tabıǵatty aıalaý aksıasyna almatylyq oqýshylarmen, stýdenttermen, mýzeıler qyzmetkerlerimen birge aktrısa, «Tomırıs» fılminiń basty keıipkeri Almıra Tursyn, tanymal blogerler Ivan Chervınskıı men Nurqoja Ersaıyn qatysty.
