Meıirjan Otynshıev, Nur Otan partıasynyń Almaty qalalyq fılıaly tóraǵasynyń birinshi orynbasary
Búginde bizdiń Almaty birtindep qalypty ómirge qaıta oralýda: zardap shekken ǵımarattardy jóndeý jáne qalpyna keltirý jumystary tolyq qarqynmen júrip jatyr, sport, mádenıet jáne óner mekemeleri, sondaı-aq Almatynyń barlyq 860 mektepke deıingi uıymdary jumys isteı bastady. Qalanyń 5 aýdanynda demalys kúnindegi azyq-túlik jármeńkeleri qaıta jandandy, 1773 almatylyq úı janyndaǵy dúkenderde birqatar áleýmettik mańyzy bar taýarlardyń baǵasy tómendedi. Sondaı-aq qyzmet kórsetý salasynyń 7700 obektisi óz qyzmetin jalǵastyrdy.
Ótken tótenshe jaǵdaı kezinde partıanyń Almaty qalalyq fılıalynyń qoǵamdyq qabyldaý bólmeleri barynsha ashyq jáne nátıjeli jumys júrgizdi. Búgingi kúni qalalyqtardan 814 ótinish kelip tústi, olardyń 712-si oń sheshimin tapty. Nur Otan partıasynyń depýtattary jáne memlekettik mekemelerdiń basshylary onlaın rejıminde 136 ótinish berýshini qamtı otyryp, 26 qabyldaý ótkizdi.
Budan bólek, Almatyda Nur Otan partıasy qalalyq fılıaly aktıviniń barlyq kúshteri jumyldyrylyp, 16 myńnan astam muqtaj azamattardy qamtı otyryp, 158 mln teńgege túrli kómek kórsetildi. Máselen, máslıhattaǵy Nur Otan depýtattyq fraksıasynyń músheleri basqa fraksıalarmen birlesip, jalpy somasy 35 mln teńgege 21 tonna azyq-túlik jınaqtady.
Depýtattardyń, praımerızge qatysýshylardyń, partıa belsendileriniń qoldaýymen TJ kezeńine tartylǵan áskerı qyzmetshiler men quqyq qorǵaý organdarynyń qyzmetkerleri kún saıyn ystyq tamaqpen qamtamasyz etildi. Osy kezeńde oqý oryndarynyń jataqhanalarynda bolǵan 2 myńǵa jýyq stýdent, sondaı-aq qala kóshelerin qıratýdan úzdiksiz tazalaǵan komýnaldyq qyzmet jumyskerleri tamaqpen jáne sýsyndarmen qamtamasyz etildi.
Bul rette Nur Otan partıasy árqashan halyqpen bolǵan jáne birge bolatynyn senimmen aıtqym keledi! Sondyqtan, Saıası keńestiń búgingi otyrysynda biz Memleket basshysynyń 11 qańtardaǵy halyqqa Joldaýynda aıtylǵan saıası jáne áleýmettik-ekonomıkalyq salalardaǵy ózekti máselelerdi sheshýge ázirlikti taǵy da talqyladyq. Sondaı-aq, ashyq daýys berý arqyly "nurotandyqtar" partıanyń kezekten tys XXI sezine delegat retinde Almatydan 28 partıa múshesin biraýyzdan tańdady.