Almaty turǵyndaryna bıylǵy jyldyń toǵyz aıynda kórsetilgen medısınalyq kómek sapasyn baqylaý barysynda 50 myńnan astam qyzmettiń túrli kemshiliktermen kórsetilgeni anyqtaldy. Nátıjesinde qaladaǵy emdeý mekemelerine 1,3 mlrd teńgeden astam aıyppul salyndy dep habarlaıdy almaty-akshamy.kz «Áleýmettik medısınalyq saqtandyrý qory» KEAQ Almaty fılıaly silteme jasap.
Medısınalyq qyzmet sapasyn baqylaý bólimi jetekshisi Ásem Manapbaevanyń aıtýynsha, kemshiliktiń basym bóligine konsýltatıvtik-dıagnostıkalyq kómek kórsetetin klınıkalar tarapynan jol berilgen. Jalpy, konsýltatıvtik-dıagnostıkalyq kómek boıynsha 45 myńnan astam qyzmet túrli kemshilikpen kórsetilgen. Nátıjesinde 80 mln teńge qaıtaryp alyndy.
Aqaýmen kórsetilgen 5,8 myń qyzmet – stasıonarlar men stasıonardy almastyratyn kómek uıymdaryna tıesili. Atalǵan kemshilikter úshin stasıonarlar men stasıonardy almastyratyn mekemeler 1,2 mlrd teńgeden astam aıyppul tóledi.
Al, kemshilikterge jol bergen emhanalar Qorǵa 60 mln teńge qaıtardy.
«Monıtorıń barysynda anyqtalǵan kemshilikterdiń deni emdeý-dıagnostıka barysynda belgilengen standarttardan aýytqý, medısınalyq qujattardy durys toltyrmaý, qyzmet baǵasyn negizsiz ósirý syndy olqylyqtarǵa kelip saıady. Sonymen qatar, «kórsetildi» dep jazylǵan belgili bir qyzmet túrleriniń shyn máninde kórsetilgenin rastaı almaǵan klınıkalar da bar», – dedi Ásem Manapbaeva.
MSQ kórsetilgen qyzmet sapasyna turaqty baqylaý júrgizip otyrady. Kórsetilgen qyzmet aqysy tyńǵylyqty tekserýden keıin tólenedi.
Buǵan deıin habarlanǵandaı, qaıtaryp alynǵan qarajat medısınalyq kómektiń ózge túrlerine jumsalady.