Kórikti jerlerdi aralap, úzdik 10 týrısik aımaqqa áýe baılanysy arqyly tegin qatynaý úshin otandyq týroperatorlardan joldama satyp alý qajet. Iaǵnı kámeletke tolmaǵan balalary bar otbasylar ishki demalystyń úshten birine deıin únemdeı alady, dep habarlaıdy Almaty-akshamy.kz
Negizgi operatory retinde «Kazakh Tourism» kompanıasy bekitilgen «Kids go free» biregeı baǵdarlamasynyń iske qosylýy jáne múmkindikteri jaıynda onyń ókili Ernur Kenjebekov aıtyp berdi.
«Bul – bizdiń elimizde ǵana emes, búkil álemde alǵash ret qolǵa alynyp otyrǵan joba. Jekelegen kompanıalar bolmasa, úkimet deńgeıinde mundaı baǵdarlamany áli eshkim iske qosqan joq. «Kids go free» baǵdarlamasy qazaqstandyq otbasylardy el ishinde demalýǵa yntalandyrady. Iaǵnı januıa búdjetin 30% deıin únemdeýge, sondaı-aq otandyq týroperatorlar úshin qarapaıym otbasylarǵa qoljetimdi pakettik týrlardy kóbirek satýǵa múmkindik beredi. Onyń aıasynda 2 jastan 18 jasqa deıingi balalar úshin bılettiń tolyq quny jyl boıy kez kelgen ýaqytta óteledi», - «Kazakh Tourism» UK» AQ ókili Ernur Kenjebekov.
Sala mamany 1 qańtardan bastap kúshine engen týrısik baǵytty memlekettik qoldaýdyń basqa da sharalary týraly qulaǵdar etti.
«Týrısik nysandardy jańadan salý nemese qoldanystaǵyny jańǵyrtýǵa ketken shyǵynnyń 10% óteledi. Sondaı-aq qonaqúıler, kempıngter, tehnıkalyq qadaǵalaý, janarmaı beketteri, tamaqtaný oryndary men saýda núktelerin turǵyzý syndy jol boıyndaǵy qyzmet túrlerine jumsalǵan qarjynyń da dál sondaı mólsheri toltyrylatyn bolady. Týrısik avtobýstar, taý shańǵysy bazalaryna arnalǵan tehnıkany satyp alý qunynyń 25% memleket óz moınyna alady», - deıdi «Kazakh Tourism» UK» AQ ókili Ernur Kenjebekov
Sondaı-aq ishki týrızmdi damytý maqsatynda Qazaqstanǵa kelgen árbir sheteldik saıahatshy úshin sýbsıdıalar qarastyrylǵan. Týroperatorlar ár sheteldik qonaqqa shamamen 15 myń teńge alady. Osylaısha memleket usynyp otyrǵan jańa qoldaý sharasy qonaqtardyń elimizde keminde 5 kún bolýyn kózdeıtin pakettik satylymdardyń úlesin belsendi túrde arttyrýǵa serpin bermek.