Otandyq bilim jáne ǵylym salasyndaǵy ótken jylǵy jumystyń qorytyndylary men bıylǵa arnalǵan mindetter baıandalǵan QR Bilim jáne ǵylym mınıstrliginiń keńeıtilgen alqa otyrysynda kún tártibindegi ózekti máseleler talqylandy. Bilim salasyndaǵy negizgi baǵyttar boıynsha atqarylǵan jumystardyń nátıjeleri de málimdeldi. QR Bilim jáne ǵylym mınıstrliginiń ashyqtyq saıasaty bılik pen buqara arasynda altyn kópir bola alady.
QR Premer-Mınıstriniń orynbasary Eraly Toǵjanov qatysqan, QR Bilim jáne ǵylym mınıstri Asqat Aımaǵambetov moderatorlyq etken alqa otyrysynda bıyl qazaqstandyqtardyń sapaly bilim alýǵa qoljetimdiligi artatyny, buǵan jańadan 200 mektep salý arqyly oqýshylar ornynyń kóbeıýi yqpal etetini, bilim berý uıymdaryna bilikti pedagogter tartylatyny, ol úshin mınıstrlik qazirdiń ózinde áleýmettik paketti usynýdy qolǵa alǵany, balabaqshalarda, mektepterde, kolejder men joǵary oqý oryndarynda bilim alý úshin qaýipsiz jáne qolaıly jaǵdaılar jasalyp, bilim berý qyzmetiniń sapasyna baqylaý da kúsheıtiletini sóz boldy.
Sonyń ishinde QR Bilim jáne ǵylym birinshi vıse-mınıstri Sholpan Tańatqyzy aıtqan pedagogterdiń biliktiligin arttyrýǵa, qala men aýyl oqýshylary arasyndaǵy bilim alshaqtyǵyn azaıtýǵa da basa nazar aýdarylatyny qazaqstandyq pedagogıkalyq qaýymdastyqtyń kóńilinen shyqty.
«Bıyl keminde 70 myń pedagog jańa bilim berý baǵdarlamalary boıynsha biliktilikti arttyrý kýrstarynan ótedi. Sondaı-aq, Mańǵystaý, Atyraý, Almaty jáne Túrkistan oblystarynda mektep oqýshylarynyń bilim sapasyn arttyrý maqsatynda osy óńirlerge pedagogterdi tartý úshin arnaıy baǵdarlama iske asyrylady. Olarǵa aıtarlyqtaı áleýmettik qoldaý kórsetiledi (koeffısenti joǵary jalaqy, baspana jaldaý jáne komýnaldyq tólemder shyǵyndaryn óteý). Bul sharalar atalǵan aımaqtarda bilim berý sapasy boıynsha úlken alshaqtyqty azaıtýǵa baǵyttalady», – dep túsindirdi Sholpan Tańatqyzy.
Ras, adamı kapıtaldyń sapasyn arttyrý – qoǵam damýyn qamtamasyz etýdiń basty tetigi. Al, qoǵamnyń zıatkerlik áleýetin ilgeriletýdi júzege asyrý pedagogterge tikeleı baılanysty. Sondyqtan bolashaq pedagogterdi daıarlaıtyn bilim ordasy retinde Abaı atyndaǵy Qazaq ulttyq pedagogıkalyq ýnıversıteti de Prezıdent tapsyrmasymen qolǵa alǵan QR Bilim jáne ǵylym mınıstrliginiń barlyq bastamalarynyń sátti júzege asýyna ózindik úles qosatynyna esh kúmán joq. Osy baǵyttaǵy jumystar jalǵasa beredi.