Qyzmettik ıtter 8 jyldan keıin "zeınetke" shyǵady
QR İİM Kınologıalyq ortalyǵynyń bastyǵy, polısıa polkovnıgi Nusqabek Zaýlanbaevtyń aıtýynsha, qylmysty ashýda qyzmettik ıttiń róli kún saıyn artyp keledi. Máselen, Qazaqstanda 8 aıda izdestirý ıtteriniń kómegimen 4292 qylmys ashyldy, onyń 618-i - esirtki qylmysy. 355 keli esirtki zattary (onyń ishinde 6 keli 130 gram sıntetıkalyq zattar) tárkilengen, dep habarlaıdy Almaty-akshamy.kz Óńirlik komýnıkasıalar qyzmetine silteme jasap.
QR İİM Kınologıalyq ortalyǵynyń bastyǵy tamyz aıynda Almaty oblysynda ótip jatqan "Qarasoranyń" jedel aldyn alý is-sharasy aıasynda polıseılik ıttiń arqasynda 290 gram geroın anyqtalyp, tárkilengenin mysalǵa keltirdi.
"Kınologıalyq ortalyqta ıtterdi qyzmet etýge daıyndap qana qoımaı, kınolog-mamandardy da oqytady. Bul úshin Túrksib aýdanynda ornalasqan ortalyqta qyzmettik ıtterdi sapaly daıyndaý úshin barlyq jaǵdaılar men múmkindikter bar. Jaqsy materıaldyq-tehnıkalyq baza quryldy, munda belgıalyq, nemis jáne shyǵys eýropalyq shopan ıtteri ósiriledi. Jyl saıyn elimizdiń óńirlerine qylmyspen kúres jáne qoǵamdyq tártipti qorǵaý júzege asyrylatyn 50-ge jýyq qyzmettik ıt beriledi. Sonymen qatar, oqytý kýrsynan 150-den astam kınolog pen sonsha ıt ótýde", - dedi N. Zaýlanbaev.
Arnaıy daıyndyq bólimshesiniń aǵa jedel ýákili, polısıa kapıtany (nusqaýshy) Rýslan Kanafın elimizdiń pogondy kınologtary óz ıtterimen birge oqý úshin ortalyqqa kelip jatqanyn aıtty. Bastapqyda barlyq ıtter synaqtan ótedi, basqasha aıtqanda, olardyń "talanttaryn" belgili bir baǵytta anyqtaıdy.
"Bul rette barlyq ıtter áleýmettený men beıimdelýden ótedi, óıtkeni olar klımattyq jaǵdaıy Almatydan ózgeshe ár túrli óńirlerden keledi. Sonymen qatar, kınologtar úı janýarlary aýyrǵan jaǵdaıda kórsetiletin medısınalyq kómekten bastap oqytylady. Sondaı-aq, ıtterdi oqytý taktıkasy, ıttiń temperamentin ajyrata bilý. Sońynda kınologtar synaq tapsyrady", - dedi R. Qanafın.
Polısıa kapıtany úıretilgen ıtterdi esirtkimen "tamaqtandyrady" degen ańyzdardy joqqa shyǵardy. Barlyǵy oqytý ádisine negizdelgen, dámdi tazartý, oıyn ádisi, basý ádisi jáne basqalary bar. Jalpy ádis – doppen oıyn.