Óńir ákimderi sý tasqynynyń zardabyn azaıtý máselelerin jeke baqylaýda ustaýǵa tıis
QR Premer-Mınıstri Álıhan Smaıylov sý tasqynyna qarsy is-sharalardyń Jol kartasyn iske asyrý máseleleri boıynsha keńes ótkizip, birqatar tapsyrma berdi, dep habarlaıdy Almaty-akshamy.kz.
Premer-Mınıstr Jol kartasynyń osy jylǵa arnalǵan is-sharalaryn iske asyrý jónindegi jumystardy aıaqtaýdy jedeldetýdi, sý basyp qalatyn qaýipti jerlerdi ǵımarattar salýǵa berip qoımaý úshin olardy sýdan qorǵaý beldeýlerine ýaqytyly aýystyrýdy qamtamasyz etýdi, sonymen qatar tıisti qurylys normalary men erejelerinde jaýyn-shashyn kárizderi júıeleriniń ótkizý qabileti normalaryn qaıta qaraýdy tapsyrdy.
«Kelesi kóktemde sý tasqynyna daıyn bolý úshin qazirden-aq qomaqty qarjy shyǵynyn qajet etpeıtin aldyn alý jumysyn júrgizý kerek. Iaǵnı ózen arnalaryn, aryqtar men kanaldardy, drenaj júıelerin tazartý, qorǵaý bógetterin salý jáne gıdrotehnıkalyq qurylystardy daıyndaýǵa basa nazar aýdarý kerek. Jalpy, óńir ákimderi sý tasqynynyń zardabyn azaıtý máselelerin jeke baqylaýda ustaýy tıis», — dedi Úkimet basshysy.
Tótenshe jaǵdaılar mınıstri Iýrıı Ilın bıylǵy kóktemde eldi mekenderdi sý basýdyń negizgi sebebi egistikterden erigen qar men jańbyr sýlarynyń mol aǵýy ekenin aıtty. Bul oraıda sý tasqynyna qarsy is-sharalardy ýaqytyly júrgizý arqyly ǵana TJ týyndaý táýekelin tómendetýge bolady.
Onyń aıtýynsha, qazir sý tasqyny qaýpi bar eldi mekenderdiń tizimine túzetý engizildi. Olardyń sany 1 046-ǵa deıin artty.