Bul týraly Úkimettiń baspasóz qyzmeti málim etti
QR Premer-Mınıstri Álıhan Smaıylov «Eni» kompanıasynyń bas óndiristik dırektory Gvıdo Brýskomen, barlaý jáne óndirý jónindegi dırektory Lýka Vınátımen kezdesti, dep habarlaıdy Almaty-akshamy.kz Úkimettiń baspasóz qyzmetine silteme jasap.
Álıhan Smaıylov Qazaqstan Úkimeti kompanıanyń elimizdiń munaı-gaz salasyn damytýǵa qosqan úlesin joǵary baǵalaıtynyn jáne uzaq merzimdi yntymaqtastyqty odan ári damytýǵa nıetti ekenin atap ótti.
«Biz Qashaǵan ken ornyn tolyq kólemde ıgerýge, Qarashyǵanaq ken ornynda munaı men kondensat óndirýdi qoldaýǵa jáne gaz salasyn damytýǵa erekshe nazar aýdaramyz», — dedi Premer-Mınıstr.
Sondaı-aq ol Úkimet «QazaqGaz» UK» AQ-men birlesip, Qashaǵanda qýaty 1 mlrd tekshe metr gaz óńdeý zaýytyn salý jónindegi konsorsıýmnyń josparlaryn qoldaıtynyn jetkizdi.
Óz kezeginde Gvıdo Brýsko kompanıanyń Qazaqstandaǵy jumysy boıynsha uzaq merzimdi jospary baryn aıtty.
«Biz qoldanystaǵy jobalar boıynsha qajetti sheshimderdi ýaqytyly qabyldap, jańalaryn, sonyń ishinde jańartylatyn energetıka salasynda iske asyrý múmkindikterin izdeımiz. Úkimettiń qoldaýynyń arqasynda jobalar boıynsha týyndaıtyn barlyq máseleler jumys tártibimen sheshiledi», — dedi Gvıdo Brýsko.