Sońǵy ýaqytta kovıdten 400-ge jýyq kisi ólimi tirkelgen
Ulybrıtanıada indet qaıta órshidi. Birikken Koróldiktiń quramyndaǵy Anglıa jáne Ýels elderinde sońǵy ýaqytta kovıdten qaıtys bolǵandar sany artyp otyr. Elge koronavırýstyń jańa tolqyny kelýi múmkin degen qaýip bar, dep habarlaıdy Almaty-akshamy.kz.
Ulttyq statısıka basqarmasynyń sońǵy derekterine sáıkes, sońǵy ýaqytta kovıdten 400-ge jýyq kisi ólimi tirkelgen. Iaǵnı aldyńǵy aptalarmen salystyrǵanda 40 paıyzǵa kóp. Bul ınfeksıalardyń qazirgi tolqyny ólim-jitimniń kóbeıýine ákelýi múmkin degendi bildiredi deıdi mamandar.
Derekterge júginsek, Ulybrıtanıa boıynsha vırýs juqtyrǵandardyń sany úsh esege artyp, 1,7 mıllıon adamǵa jetken, dep jazady qazaqstan.tv.
Densaýlyq saqtaý mamandary kovıdke qystaǵy tumaý aýrýy qosylyp, aýrýhanalarda oryn bolmaı qalýy múmkin dep dabyl qaǵýda.
«Kovıdke baılanysty qarbalasqa toly jaz mezgilinen keıin grıpp aýrýy órshıtin ýaqyt kele jatyr. Buǵan densaýlyq saqtaý qyzmetinde mamandardyń jetispeýshiligin qosyńyz. Sondyqtan qıyn kezeńderge daıyn bolýymyz kerek», -deıdi Ulybrıtanıa ulttyq densaýlyq saqtaý qyzmetiniń atqarýshy dırektory Amanda Prıchard.
Aýrýhanalarǵa salmaq túspeý úshin shuǵyl áreket etetin arnaıy toptar jasaqtalyp jatyr. Olar jedel járdemmen jetip, úıde ǵana kómek kórsetedi. Qarttar úılerinde de medısına qyzmetkerleri úshin mamandandyrylǵan arnaıy ortalyqtar uıymdastyrylmaq. Bul jobalarǵa úkimet 500 mln sterlıń fýntyn bóledi. Oǵan qosa naýqastar qosymsha 100 myń tósek orynmen qamtamasyz etilmek. dárigerdiń baqylaýyndaǵy naýqastarǵa 2500 vırtýaldy palatalar ashylady.