Altyn quımaǵa negizinen almatylyqtar qyzyǵýshylyq tanytqan.
Ústimizdegi jyldyń qańtar aıynda qazaqstandyqtar 1700-den astam altyn quıma satyp alǵan, dep habarlaıdy Almaty-akshamy.kz Ulttyq bankiniń baspasóz qyzmetine cilteme jasap.
Satylyp alynǵan quımalardyń jalpy salmaǵy 68,6 kelini quraıdy. Halyqqa tazartylǵan altyn quımalardy satý jáne satyp alý baǵdarlamasyn Ulttyq Bank 2017 jyly iske qosqan bolatyn. Baǵdarlama qolǵa alynǵaly jalpy salmaǵy 2,8 tonnaǵa jýyq 76 676 quıma satylǵan.
Altyn quımalar bes túrli salmaqta usynylady: 5, 10, 20, 50 jáne 100 g. Satyp alýshylar arasynda óte joǵary suranysqa ıe túri – 10 gramdyq quıma. Jalpy satylǵan quımalar arasynda onyń úlesi – 27%, ıaǵnı, 20 898 dana. Odan keıin 100 gramdyq quıma suranysqa ıe, 16 930 dana (22%) satylǵan, 20 gramdyq quımadan 14 779 dana (19%), 5 gramdyq quımadan 13 566 dana (18%), 50 gramdyq quımadan 10 503 dana (14%) satyldy. Altyn quımalar Almaty, Nur-Sultan jáne Atyraý qalalarynda kóp satylady.
«Altyn quımalar senimdi ınvestısıa quraly bola alady. Altyn quımalar naryǵyndaǵy ótimdiliktiń basty kepili – bank pen banktik emes aıyrbastaý pýnkteri klıentke aqshany sol kúni tóleı otyryp, altyn quımalardy keri satyp ala alady», - delingen Ulttyq bankiniń baspasóz qyzmetiniń habarlamasynda.
Baǵdarlama bastalǵannan beri ekinshi deńgeıli bankter men jekelegen banktik emes pýnkter jalpy salmaǵy 275 keli 11 292 altyn quımany keri satyp alǵan, bul – jalpy satylǵan altyn quımalardyń 15%-y. Olar keri satyp alǵan altyn quımalardyń barlyǵy derlik Ulttyq Banktiń fılıaldary arqyly halyqqa satylady.
Árbir quıma qorǵaý elementterimen qaptalǵan (quımanyń aına beti, mıkrotekst jáne jıegi bar) jáne arnaıy qorapqa salynyp shyǵady, sol arqyly quımanyń ashylǵan-ashylmaǵanyn ońaı tekserýge bolady. Qorǵap turatyn qorap, sondaı-aq sapa sertıfıkaty bolyp sanalady. Sondyqtan, altyn quımany uqypty saqtap, qorabyn búldirmeýge keńes beremiz.
Qazir altyn quımalardy Halyk Bank, Eýrazıalyq Bank, Jusan Bank, SentrKredıt Banki, sondaı-aq jekelegen banktik emes pýnkterden satyp alyp, keri satýǵa bolady.