Almatynyń Jetisý aýdanyndaǵy Qulager, Aınabulaq-2 jáne Kemel shaǵyn aýdandarynda dene shynyqtyrý-saýyqtyrý ortalyqtary salynady dep habarlaıdy almaty-akshamy.kz
Almaty qalasy Jetisý aýdanynyń úsh turǵyn shaǵynaýdanynda bıyl jańa dene shynyqtyrý-saýyqtyrý ortalyqtary paıda bolady. Aýdan ákimi Gúlnar Kókebaeva Óńirlik komýnıkasıalar qyzmetiniń brıfıńinde qurylystyń barysy týraly habarlady.
Gúlnar Kókebaevanyń aıtýynsha, aýdandardyń damýy úshin bilim, medısına jáne belsendi demalys oryndarynyń qadamdyq jaqyndyqta ornalasýy mańyzdy. Sondyqtan Jetisý aýdanynda birden úsh dene shynyqtyrý-saýyqtyrý keshenin salý týraly sheshim qabyldandy.
«Bul Jetisý aýdanyn jaıly etedi. Bizdiń maqsat – sportpen shuǵyldanýǵa jáne bos ýaqytty ótkizý úshin múmkindiginshe kóp oryn qurý. Dene shynyqtyrý-saýyqtyrý ortalyqtaryna barý aqysyz bolady. Memleket jáne qala basshylyǵy eldi mekenderdi damytýǵa, onyń ishinde buqaralyq sportty nasıhattaýǵa erekshe nazar aýdarady, biz barlyq jaǵdaıdy jasaımyz», - dedi G. Kókebaeva.
Qazirgi kezde Qulager shaǵynaýdanynda (aıaqtalý merzimi - 2022 j.), Aınabulaq-2 jáne Kemel shaǵyn aýdandarynda (aıaqtalý merzimi - 2021 j.) úsh dene shynyqtyrý-saýyqtyrý ortalyǵynyń qurylysy júrgizilýde. Ázirge qurylys jumystary 40 paıyzǵa oryndaldy. Bul Jetisý aýdanynyń balalary, jastary men zeınetkerleri úshin jańa tartymdy oryndar bolady dep josparlanýda.
Jetisý aýdanynyń ákimi Kemel shaǵynaýdanynyń turǵyndary úshin bolatyn ózgerister týraly da aıtty.
«Shildede otbasylyq-dárigerlik ambýlatorıanyń qurylysy bastaldy, onyń jobalyq qýaty boıynsha aýysymyna 200 kelýshini qabyldaıdy. Ambýlatorıanyń eski ǵımaraty buzyldy», - dedi Gúlnar Kókebaeva.
Sondaı-aq «Aınabulaq-3» shaǵyn aýdanyndaǵy №11 emhana ǵımaratyna kúrdeli jóndeý júrgizilýde, ony 2022 jyldyń birinshi toqsanynda aıaqtaý josparlanǵan.