Elimizde jazdyq daqyldardy jappaı egý bastaldy. Bul týraly Úkimet otyrysynda aýyl sharýashylyǵy mınıstri Aıdarbek Saparov málimdedi, dep habarlaıdy aqshamnews.kz
Ol búgingi kúni jazdyq daqyldardy jappaı egý bastalǵanyn, bul rette barlyq óńirler egý jumysyna kiriskenin atap ótti. ASHM derekteri boıynsha barlyǵy 3,7 mln gektar, onyń ishinde dándi daqyldar – 2 mln gektar, jemshóp – 300 myń gektar, maıly daqyldar – 888 myń gektar, kókónis-baqsha daqyldary jáne kartop – 195 myń gektarǵa egildi. Maqta men qant qyzylshasyn sebý jumysy aıaqtalyp qaldy.
«Kúzdik daqyldarǵa keletin bolsaq, 2025 jyldyń eginine kúzdik dándi daqyldar 405,7 myń ga alańǵa egildi. Olardyń 74%-y jaqsy, al 23%-y qanaǵattanarlyq jaǵdaıda», — dep naqtylady Aıdarbek Saparov.
Sonymen qatar spıkerdiń aıtýynsha, ońtústik óńirlerde erte pisetin kókónisterdi jınaý bastaldy. Atap aıtqanda, Túrkistan oblysynda 1,2 myń gektar alqaptan 38,3 myń tonna qyryqqabat jınaldy.
Bıyl 580 myń tonnaǵa jýyq erte pisetin kókónis jınaý josparlanýda, bul jańa ónim jınaýǵa deıingi maýsymaralyq kezeńde ishki naryqtyń qajettiligin qamtamasyz etýge múmkindik beredi.
