Aýyl sharýashylyǵy mınıstri Aıdarbek Saparov Úkimet otyrysynda kóktemgi dala jumystaryn (KDJ) qarjylandyrý týraly baıandady, dep habarlaıdy aqshamnews.kz
Ol qarjylandyrýdyń erte bastalýynyń arqasynda fermerler negizgi resýrstar – tuqym, tyńaıtqysh, JJM, tehnıkany tıimdi baǵamen aldyn ala satyp alǵanyn atap ótti.
Búgingi tańda KDJ qarjylandyrýǵa 480,6 mlrd teńge somasyna 7 myń ótinim kelip tústi, 385 mlrd teńge somasyna aýyl sharýashylyǵy taýaryn óndirýshiler (ASHTÓ) qarjylandyryldy.
Jeńildetilgen qarjylandyrýǵa 8 áleýmettik-kásipkerlik korporasıa qatysýda, olarǵa fermerlerdi qarjylandyrý úshin 131,1 mlrd teńge bólindi. Kepil jetkiliksizdigi máselesin sheshý úshin qaryz somasynyń 85% mólsherinde kepildik berý baǵdarlamasyn iske asyrý jalǵasýda. Osy jyly jalpy kepildik somasy 135,2 mlrd teńgege 943 kepildik berildi. Qaryzdardyń jalpy somasy 159 mlrd teńgeni qurady.
«Jyldyq 5% syıaqy mólsherlemesi boıynsha 200 mlrd teńge somasyna jeńildetilgen lızıń baǵdarlamasy otandyq óndiristiń 6 myńǵa jýyq aýyl sharýashylyǵy tehnıkasyn satyp alýǵa múmkindik beretin bolady. Búgingi kúni 120 mlrd teńgege 3,2 myń ótinim kelip tústi. Forvardtyq satyp alý sheńberinde Azyq-túlik kelisim shart korporasıasyna 17,7 mlrd teńge somasyna ASHTÓ-den 191 ótinim kelip tústi», — dep tolyqtyrdy Aıdarbek Saparov.
