Jyl basynan beri zańsyz mazmundaǵy 5 myńnan asa saıt belgili boldy
Ortalyq komýnıkasıalar qyzmetinde ótken brıfıńte İshki ister mınıstrligi Ákimshilik polısıa komıteti tóraǵasynyń orynbasary Renat Zulhaıyrov kámeletke tolmaǵandarǵa qatysty jynystyq sıpattaǵy qylmystar týraly baıandady, dep habarlaıdy Almaty-akshamy.kz Azattyq Rýhy-na silteme jasap.
«Kámelet jasqa tolmaǵandarǵa qatysty jynystyq sıpattaǵy qylmystardyń 60% astamyn aınalasyndaǵylar jasaıdy. Atap aıtqanda, ákeler, ógeı ata-ana jáne jaqyn tanystary. Mundaı qylmystardyń 40%, bylaı aıtqanda, 16 jasqa tolmaǵan adammen erikti kelisim negizde jasalady. Qazaqstanda mundaı qylmystardy kóbine 18 jastan 25 jasqa deıingi adamdar jasap jatady», - dedi Renat Zulhaıyrov.
Onyń aıtýynsha, jynystyq sıpattaǵy qylmystarǵa moraldyq tárbıeniń tómendigi men ınternet keńistiginiń ashyqtyǵy kesirin tıgizip otyr.
«Biz Aqparat jáne qoǵamdyq damý mınıstrligimen birge zańsyz mazmundaǵy málimetterdi anyqtaımyz. Bıyldyń ózinde osyndaı sıpattaǵy 5 myńnan asa saıt belgili boldy. Búginde onyń 1,5 myńnan astamy buǵattaldy», - dep túıindedi Komıtet tóraǵasynyń orynbasary.