Áskerı qyzmetshiler kásibı gir sportymen áskerde júrgende aınalysa bastaǵan
Qyrǵyzstan astanasy Bishkekte kásipqoılar arasynda ótken gir sportynan qurlyq birinshiliginde Aıagóz garnızonynyń úsh áskerı qyzmetshisi chempıon atandy, dep habarlaıdy Almaty-akshamy.kz.
Jarysqa on bes elden júzden astam myqty sportshy qatysty. Jeti salmaq dárejesiniń úsheýinde jetistikke jetken qazaqstandyqtar tamasha tehnıka úlgisin, tabandylyq pen jeńiske degen muqalmas erik-jiger kórsetti.
68 keli salmaqtaǵy qazaqstandyq gir sportshysy serjant Berik Qazrytqanov altyn júldemen marapattaldy. 3-synypty serjant Tileýjan Jańabekov 85 keli salmaqta top jarsa, 95 keliden joǵary salmaqta synǵa túsken sportshylar arasynda 3-synypty serjant Suńqar Qýanyshevqa teń keler qarsylas bolmady.
– Jeńiske jetý ońaı bolǵan joq. Qarsylastarymyz da osal emes-ti. Degenmen úzdiksiz jattyǵýlar men osyndaı jarystarǵa qatysý tájirıbesi bárinen ozýǵa kómektesti, – dep atap ótti chempıon – gir sportynyń sheberi 3-synypty serjant Suńqar Qýanyshev.
Áskerı qyzmetshiler kásibı gir sportymen áskerde júrgende aınalysa bastaǵan. Qajyrly eńbektiń arqasynda olar qysqa ýaqyt ishinde «sport sheberi» ataǵyn alyp, edáýir jetistikterge jetti.
2022 jyldyń qarasha aıynda Úndistanda ótken jarysta 3-synypty serjant Suńqar Qýanyshev 95 keliden astam salmaqta kásibı sportshylar arasynda álem chempıony atanǵanyn aıta ketken jón.