2024 jyly kólik ınfraqurylymyn odan ári damytý maqsatynda Shymkent, Pavlodar jáne Qyzylorda qalalaryndaǵy temirjol vokzaldarynda tolyq rekonstrýksıa jáne kúrdeli jóndeý jumystary atqaryldy.
Bul jumystar jolaýshylarǵa sapaly ári yńǵaıly qyzmet kórsetýge, ınfraqurylymdy zamanaýı talaptarǵa saı etýge baǵyttalǵan, dep habarlaıdy aqshamnews.kz Kólik mınıstrligine silteme jasap.
Shymkent jáne Pavlodar qalalarynyń temirjol vokzaldary rekonstrýksıadan ótse, Qyzylorda qalasy temirjol vokzaly kúrdeli jóndeý jumysymen qamtyldy.
Shymkent vokzalynyń ótkizý múmkindigi aıtarlyqtaı artty. Buryn táýligine 2000 jolaýshyǵa qyzmet kórsetilse, qazir bul kórsetkish 6000 jolaýshyǵa jetti. Ǵımarattyń jalpy aýmaǵy 1770,2 sharshy metrden 2250 sharshy metrge deıin keńeıtildi.
Pavlodar vokzalynda múmkindigi shekteýli jandarǵa arnalǵan eki júk-jolaýshy lıfti ornatyldy. Ǵımarat ishine taktıldi baǵyttaǵyshtar tóselip, arnaıy demalys bólmeleri men sanıtarlyq toraptar jasaqtaldy.
Qyzylordada 1905 jáne 1968 jyldary salynǵan eki tarıhı ǵımarat jańǵyrtylyp, jolaýshylar aǵyny birneshe ese artty.
Úsh vokzalda da jóndeý jumystary aıasynda syrtqy kelbeti jańartylyp, esik-tereze júıeleri men ınjenerlik komýnıkasıalar retke keltirildi. Erekshe qajettiligi bar jandar úshin pandýstar, taktıldi jolaqtar jáne arnaıy kasalar ornatyldy. Sonymen qatar zamanaýı WiFi aımaqtary, aqparattyq ekrandar men rentgen apparattary iske qosyldy.
Qazirgi tańda ártúrli baǵytta Shymkent vokzalynan 20 jup, Pavlodar vokzalynan 16 jup, al Qyzylorda vokzalynan 15 jup poıyz qatynaıdy.