Jyl basynan beri qazaqstandyqtar mindetti áleýmettik medısınalyq saqtandyrý (MÁMS) júıesiniń esebinen kórsetilgen kompúterlik tomografıa (KT) jáne magnıttik-rezonanstyq tomografıa (MRT) sıaqty 1 mln-nan astam qymbat zertteýlerden ótti.
Bul týraly Densaýlyq saqtaý mınıstrliginiń saıtynda jarıalandy, dep habarlaıdy aqshamnews.kz.
MRT jáne KT – bul ártúrli aýrýlar men patologıalardy erte satysynda anyqtaýǵa, sondaı-aq aǵzalar men tinderdiń jaǵdaıyn baǵalaýǵa kómektesetin mańyzdy dıagnostıkalyq ádister.
Osy qyzmetter kórsetilgen 500 myń pasıenttiń 45 myńy onkologıalyq aýrýlarǵa kúdik týyndaǵan jaǵdaıda zertteýden ótti.
Aǵymdaǵy jyly zertteýlerdiń sany ótken jyldyń sáıkes kezeńimen salystyrǵanda 31,2 myńǵa ósti.
Medısınalyq kórsetkishter men saqtandyrý mártebesi bolǵan jaǵdaıda, joǵaryda atalǵan dıagnostıkalyq ádister pasıentterge tegin qoljetimdi.
MÁMS júıesi el azamattaryna qymbat medısınalyq qyzmetterge qol jetkizýge, pasıentterge qarjylyq júktemeni azaıtýǵa jáne sapaly medısınalyq qyzmetterdiń qoljetimdiligin arttyrýǵa múmkindik beredi.