Almaty qurylys basqarmasy qaladaǵy áleýmettik ınfraqurylym qurylysynyń barysy týraly habarlady.
Búginde qalada «Aqjar», «Altyn Besik» jáne «Jas Qanat» shaǵyn aýdandarynda 700 oryndyq úsh balabaqsha salynyp jatyr. Olardy osy jyldyń 2 toqsanynda aıaqtaý josparlanǵan. Bul rette, byltyr maýsym aıynda «Saıaly» jáne «Aınabulaq» shaǵyn aýdandarynda árqaısysy 160 oryndyq eki balabaqsha paıdalanýǵa berildi.
Densaýlyq saqtaý salasyna kelsek, bıyl shilde aıyna deıin «Saıaly», «Qarasý», «Nurshashqan» shaǵyn aýdandarynda, sonymen qatar, Túrksib aýdany Aıbasov kóshesinde otbasylyq-dárigerlik ambýlatorıalardyń qurylysy aıaqtalady. Sonymen qatar, byltyr «Mamyr-5» jáne «Kemel» shaǵyn aýdandarynda ambýlatorıalar salyndy.
Buǵan qosa, osy jyldyń birinshi toqsanynda aıaqtalatyn «Balalar shuǵyl medısınalyq kómek ortalyǵy» úshin qabyldaý bólimshesi ǵımaratynyń qurylysy júrgizilip jatyr.