Atap aıtqanda, bıyl 25 shaqyrym joldy rekonstrýksıalaý jáne salý josparlansa, 42 shaqyrym jolǵa kúrdeli jóndeý júrgizý kózdelip otyr.
Almaty oblysyndaǵy jóndeý jumystary jalpy uzyndyǵy 454 shaqyrymdy quraıtyn jergilikti mańyzy bar joldarǵa júrgizilmek, dep habarlaıdy Almaty-akshamy.kz
Budan ózge, óńirdegi 258 shaqyrym jolǵa ortasha jóndeý jumystary iske asyrylmaq. Al aǵymdyq jóndeý jumystary 130 shaqyrymda júrgiziledi.
Sondaı-aq Almaty qalasynyń shekarasynan Úlken Almaty aınalma avtomobıl jolyna deıin Saıyn, Rysqulov, Abaı jáne Soltústik jartylaı aınalym kósheleriniń qurylysy bastaldy. Jobany iske asyrýǵa Ulttyq Qordan 8 mlrd. teńge qarastyrylǵan. Qazirgi ýaqytta tas joldyń osin qalpyna keltirý jáne bekitý, topyraq-ósimdik qabatyn alý jáne jer tósemin tegisteý boıynsha jumystar júrgizilýde.
Búginde óńirdiń týrısik áleýetin damytýǵa erekshe kóńil bólinýde. Ásirese, týrısik baǵyttardaǵy joldar úlken basymdyqqa ıe. Osy oraıda qazirgi tańda Balqash kóline baratyn 102 shaqyrym kirme joldy rekonstrýksıalaý boıynsha qurylys-montajdaý jumystary júrgizilip jatyr. Sonymen qatar Sharyn shatqalyna aparatyn jolda ortasha jáne kúrdeli jóndeý jumystary júrgizilýde. Jumystar tolyqtaı 2023 jyly aıaqtalmaq.
Bir bul ǵana emes. Búginde uzyndyǵy 34 shaqyrymdy quraıtyn «Kókpekti-Kegen-Túp-Jalańash-Saty-Qurmetti-Kólsaı kóline kireberis» kólik jolyn kúrdeli jóndeý jumysy iske asyrylýda. Qazirgi ýaqytta atalǵan ýchaskede barlyq qajetti resýrstar qarastyrylǵan jáne jol-qurylys tehnıkasy jumyldyrylǵan.
Sondaı-aq respýblıkalyq mańyzy bar joldar da rekonstrýksıalanýda. Máselen, «Qurty-Qapshaǵaı» avtojol ýchaskesi jańartylyp, jol tósemderiniń qabattaryn ornatý boıynsha jumystar júrgizilýde. Jumystardy tolyq aıaqtaý 2023 jylǵa josparlanǵan.
Sonymen qatar uzyndyǵy 96 shaqyrymdy quraıtyn «Uzynaǵash-Otar» ýchaskesin rekonstrýksıalaý jumystary da jalǵasýda. Qazirgi ýaqytta uzyndyǵy 48 shaqyrym ýchaske boıynsha qozǵalys eki baǵytta ashyldy jáne abattandyrý jumystary júrgizilip jatyr. Jobany tolyq aıaqtaý 2024 jylǵa josparlanýda.