Magıstratýra men doktorantýraǵa túsýshilerge ekinshi múmkindik týdy
Keshendi testileýge qujat qabyldaý 1 qarashada bastaldy, dep habarlaıdy Almaty-akshamy.kz
Bilim jáne ǵylym mınıstri Asqat Aımaǵambetov áleýmettik jelidegi paraqshasynda magıstratýra men doktorantýraǵa túsý boıynsha qabyldanǵan sheshim týraly jazdy. Sondaǵy aqparatqa súıensek, budan bylaı oqýǵa qabyldaý jylyna eki ret ótkiziledi. Baıqaýǵa jazda grantqa túse almaǵan úmitkerler de, buryn keshendi testileýden ótpegender de qatysa alady.
Al Bilim jáne ǵylym vıse-mınıstri Qýanysh Erǵalıev jaqynda mundaı sheshim talapkerlerdiń qajettiligi men múddesine qaraı qabyldanǵanyn jetkizdi.
«Mundaı mańyzdy sheshimderdi qabyldaý kezinde mınıstrlik stýdentterdiń múddelerin árqashan birinshi orynǵa qoıady. Buǵan deıin Bilim jáne ǵylym mınıstri Asqat Aımaǵambetov memlekettik grantqa úmitkerler jylyna eki ret, dástúrli túrde – jazda jáne qosymsha qysta testileýden óte alatynyn habarlaǵan bolatyn. Soǵan sáıkes talapkerler 1 qarashadan bastap magıstratýraǵa túsý úshin ekinshi márte ótkiziletin keshendi testileýge qujattaryn tapsyra alady. Testileýdi sátti tapsyrǵan jaǵdaıda úmitkerler jaz aıynda oqýǵa qabyldaý qorytyndysy boıynsha bólingen granttardy utyp ala alady»,- dedi mınıstrdiń orynbasary.
Endi emtıhanǵa tirkelý, mamandyqtar bólinisinde granttardyń sanyna toqtalsaq.
Eń áýeli ekinshi keshendi testileýge qatysý úshin tirkelý Ulttyq testileý ortalyǵynyń app.testcenter.kz saıtynda ótedi. Qujat qabyldaý 2021 jyldyń 1-15 qarashasy aralyǵynda júrgiziledi. Keshendi testileý 2021 jyldyń 18 qarashasynan 11 jeltoqsanyna deıin jalǵasady.
Magıstratýraǵa grantqa úmitkerler dástúrli túrde shet tili, bilim berý baǵdarlamalary tobynyń beıini jáne oqýǵa daıyndyǵyn anyqtaý boıynsha test tapsyrady. Shet tilin meńgergenin rastaıtyn halyqaralyq sertıfıkaty bar adamdar avtomatty túrde shet tili boıynsha testileýden bosatylady. Test nátıjelerin testileý aıaqtalǵannan keıin birden bilýge bolady. Nátıjelerimen kelispegen jaǵdaıda qatysýshylar emtıhan aıaqtalǵan soń 30 mınýttan keıin onlaın-apellásıaǵa ótinish bere alady.
Memlekettik bilim berý tapsyrysy boıynsha jáne aqyly negizde ǵylymı-pedagogıkalyq magıstratýraǵa túsý úshin shekti bal – 75, beıindi magıstratýraǵa túsý úshin 50 baldy quraıtynyn atap ótken jón.
Bilim berý granttaryn taǵaıyndaý konkýrsyna qatysý úshin qujattar 2021 jylǵy 25 jeltoqsanǵa deıin qabyldanady. Magıstratýraǵa qabyldaý 2021 jylǵy 26 jeltoqsan men 10 qańtar aralyǵynda ótedi.
Magıstratýraǵa túsýshiler barlyǵy 3 myńnan asa memlekettik bilim grantyna úmitker bola alady. Mamandyqtar bólinisinde eń kóp grant «Hımıa» (172 grant), «Veterınarıa» (169), «Mehanıka jáne metal óńdeý» (156), «Metallýrgıalyq ınjenerıa» (137), «Qurylys materıaldaryn, buıymdaryn men konstrýksıalaryn óndirý» (132 grant), «Materıaltaný jáne jańa materıaldar tehnologıasy» (130) jáne basqa mamandyqtar boıynsha bólingen.
Bıyl doktorantýraǵa túsý erejelerine ózgerister engizilgen edi. Endi doktorantýraǵa qabyldaý «1 talapker – 1 kompúter – 1 kamera» qaǵıdaty boıynsha óńirlik testileý ortalyqtarynda elektrondy formatta ótetin túsý emtıhanynyń nátıjeleri boıynsha júzege asyrylady. Bul emtıhan tapsyrý kezinde ashyqtyqty jáne transparenttilikti qamtamasyz etýge baǵyttalǵan.
Bilim jáne ǵylym mınıstrliginiń málimdeýinshe, qabyldaý emtıhany esse jazý, doktorantýrada oqýǵa daıyndyq testileýi jáne bilim berý baǵdarlamasy tobynyń beıini boıynsha emtıhandardan turady.
Ekinshi ret ótkiziletin doktorantýraǵa túsý emtıhanyna qatysý úshin de sol Ulttyq testileý ortalyǵynyń app.testcenter.kz saıtynda tirkelý kerek. Munda da magıstratýradaǵydaı qabyldaý emtıhany 2021 jyldyń 18 qarashasy men 11 jeltoqsany aralyǵynda, oqýǵa qabyldaý 2021 jylǵy 26 jeltoqsan men 10 qańtar aralyǵynda ótedi. Aıta keteıik, memlekettik bilim berý tapsyrysy boıynsha jáne aqyly negizde oqýǵa túsý úshin ótý baly 75 baldy quraıdy.
Doktorantýrada bilim berý granttary joǵary oqý oryndary boıynsha bólingen. Onyń ishinde eń kóbi L.N.Gýmılev atyndaǵy Eýrazıa ulttyq ýnıversıtetine (87 oryn) tıesili. Munda «Pedagogıka jáne psıhologıa», «Informatıka pedagogterin daıarlaý», «Áleýmetik pedagogıka jáne ózin-ózi taný mamandaryn daıarlaý», «Fılosofıa jáne ádep», «Tarıh jáne arheologıa», «Áleýmettaný», «Saıasattaný jáne konflıktologıa», t.b. mamandyqtarda oqýǵa múmkindik bar. Grant bólinisi boıynsha ekinshi orynda Ál-Farabı atyndaǵy Qazaq ulttyq ýnıversıteti tur. Atalǵan oqý ornyna «Islamtaný», «Shyǵystaný», «Fılologıa», «Jýrnalısıka jáne reporter isi», «Memlekettik jáne jergilikti basqarý», taǵysyn taǵy túrli baǵyttaǵy bilim berý baǵdarlamalary boıynsha 78 orynǵa grant berilgen. Joǵarydaǵy qos JOO-dan bólek taǵy 41 otandyq ýnıversıtet ártúrli mamandyqtar boıynsha doktoranttardy daıarlaıdy. Bul týraly tolyǵyraq Ulttyq testileý ortalyǵynyń saıtynda ornalastyrylǵan derekten bilýge bolady.