Tótenshe jaǵdaılar mınıstrligi balalardyń qaýipsizdigine baılanysty alańdaýshylyq bildirip otyr, dep habarlaıdy aqshamnews.kz
"Jyly mezgildiń bastalýymen, sondaı-aq jazǵy mektep demalysy kezinde jyl saıyn osyndaı oqıǵalar sany artady. Jyl basynan bastap TJM Strategıalyq josparlaý jáne jedel basqarý komandalyq ortalyǵyna balalardyń terezeden qulaýyna baılanysty 60 jazataıym oqıǵa (19.05.2025 jylǵy jaǵdaı boıynsha) týraly aqparat kelip tústi. Bes bala oqıǵa ornynda qaıtys boldy, 55 bala túrli jaraqat alyp, medısınalyq mekemelerge jetkizildi", – deıdi Tótenshelikter.
2024 jyly osyndaı 196 oqıǵa tirkelgen. Eresekterdiń qaraýynsyz qalǵan 2 jastan 13 jasqa deıingi balalar kóp. Kóbine qaıǵyly oqıǵalar balalar moskıt torlaryna súıengen kezde bolady, sebebi bul torlar artyq salmaqqa shydamaıdy.
Qazirgi ýaqytta, vedomstvo basshysynyń tapsyrmasymen elimizdiń barlyq óńirinde profılaktıkalyq jumystar kúsheıtilgen. Qutqarýshylar, ata-analarmen kezdesý kezinde jáne balalar mekemelerinde reıdter, profılaktıkalyq is-sharalar ótkizedi.
Tótenshe jaǵdaılar mınıstrligi barlyq ata-analar men balalardyń zańdy ókilderin qaýipsizdik sharalaryn qatań saqtaýǵa shaqyrady:
Balalardy qaraýsyz qaldyrmańyz;
Moskıt torlaryna senbeńiz, olar balany ustap qalmaıdy;
Terezelerge arnaıy bekitkishter men blokatorlardy ornatyńyz;
Bala tereze aldyna shyǵa almas úshin, tereze mańyndaǵy jıhazdardy alyp tastańyz.