QR Densaýlyq saqtaý mınıstri Aqmaral Álnazarova Úkimet otyrysynda mektep medısınasyn jańǵyrtý, mekteptegi tamaqtaný sapasyn arttyrý jáne balalar lagerlerindegi sanıtarıalyq-epıdemıologıalyq qaýipsizdikti qamtamasyz etý sharalary týraly baıandady.
Medısınalyq qyzmetterdiń qoljetimdiligi men sapasyn arttyrý maqsatynda mektep medısınasynda meıirgerlerdiń róli kúsheıtilýde, dep habarlaıdy aqshamnews.kz.
Máselen, meıirgerlerdiń júktemesin azaıtý (bir mólsherleme 700 emes, 500 oqýshydan keletindeı) josparlanyp otyr, oqýshy sany 1000-nan asatyn iri mektepterde stomatologıalyq aýrýlardyń profılaktıkasyna arnalǵan arnaıy kabınetter ashylady. Sonymen qatar, medısınalyq tekserý jáne medısına qyzmetkerleriniń biliktiligin arttyrý tártibi qaıta qaralýda.
Densaýlyq saqtaý mınıstrligi Mekteptegi tamaqtaný standartyn qaıta qarady jáne ol bıylǵy 1 qyrkúıekten bastap kúshine enedi. Halyqaralyq usynymdarǵa sáıkes ázirlengen tıptik mázir balalar organızminiń fızıkalyq jáne aqyl-oı damýyna paıdaly bolmaq.
Bul standart eldegi barlyq bilim berý jáne mektepke deıingi uıymdarǵa qoldanylady. Asqanasy joq shaǵyn jınaqty mektepter úshin jeke sheshimder qabyldanady. Jańa erejege sáıkes, qant mólsheri 3,6 ese, al tuz 5 esege deıin qysqartylady. Mekteptegi tamaqtanýǵa qanaǵattanýshylyq deńgeıin baǵalaý úshin Jelinbeı qalatyn taǵam ındeksi engiziledi.
Kútiletin nátıje — ınfeksıalyq emes aýrýlardyń, atap aıtqanda, balalar semizdigi 15%-ǵa, qant dıabeti 20%-ǵa, arterıalyq gıpertenzıa 18%-ǵa deıin, basqa sozylmaly aýrýlar 15%-ǵa deıin tómendeýi múmkin.
Bıyl 191 mektep, sonyń ishinde 54 mektep asqanasynyń sanıtarıalyq qaǵıdalar men gıgıenalyq normatıvterge sáıkestigi turǵysynan tekserildi. Tekserý barysynda apatty jaǵdaıdaǵy ǵımarattar, sanıtarıalyq-epıdemıologıalyq qorytyndylardyń bolmaýy, mektepterdiń shamadan tys toltyrylýy, sanıtarıalyq-tehnıkalyq jaǵdaıdyń nasharlyǵy jáne basqa da kemshilikter anyqtaldy. Nátıjesinde 150 nusqama berilip, 12 mln teńgeden astam aıyppul salyndy, 31 adam jumystan shettetilip, 6 is sotqa berildi.
Mekteptegi tamaqtaný qaýipsizdigin qamtamasyz etý maqsatynda Densaýlyq saqtaý mınıstrligi bilim berý nysandaryndaǵy memlekettik baqylaýdy kúsheıtip jatqanyn aıta ketken jón.
Túzetýler balalar bolatyn nysandarǵa erekshe mártebe berý, tekserý týraly aldyn ala habarlaý rásimin alyp tastaý jáne nysandardy sanıtarıalyq-epıdemıologıalyq talaptarǵa sáıkestendirý úshin monıtorıńtik saparlar júıesin engizýdi kózdeıdi.
Jazǵy demalys kezinde balalar lagerleriniń sanıtarıalyq-epıdemıologıalyq qaýipsizdigi qamtamasyz etiledi.
«Árbir lager, onyń ishinde shatyrly lagerler de maýsym bastalǵanǵa deıin sanıtarıalyq-epıdemıologıalyq qorytyndy alýǵa mindetti. 2024 jyly lagerlerdiń 19%-y (37 lager) daıyndyqty ýaqytynda aıaqtaı almady jáne balalardy qabyldaýdy bastaı almady. Jazǵy kezeńde balalardyń sanıtarıalyq-epıdemıologıalyq qaýipsizdigin qamtamasyz etý maqsatynda ár maýsymdyq lagerge sanıtarıalyq-epıdemıologıalyq qyzmet mamandary bekitildi, lager basshylyǵymen aqparattyq-túsindirý jumystary júrgizilýde, Sanıtarıalyq-epıdemıologıalyq baqylaý komıtetinde qyzý jeli uıymdastyryldy», — dedi A. Álnazarova.
Densaýlyq saqtaý mınıstrligi ata-analardy resmı tirkelgen lagerlerdi tańdaýǵa shaqyrady — olardyń tizimi https://www.gov.kz/memleket/entities/ksek?lang=ru saıtynda qoljetimdi.