Májilis spıkeri EQYU-nyń Prezıdent saılaýy týraly qorytyndysyna pikir bildirdi
«Birinshiden, muny uıymnyń syny emes, usynymy dep túsiný kerek. Ekinshiden, "bitken iske synshy kóp" degen sóz bar. Sondyqtan, biz ózimiz úshin kimniń pikiri mańyzdy ekenin aıqyndap alýymyz kerek. Menińshe, bizge Qazaqstan halqynyń pikiri mańyzdy. Qazaqstan halqy Qasym-Jomart Kemelulyna basym kópshilikpen óziniń senimin, qoldaýyn kórsetti. Ádil ári taza saılaý ótti. Buǵan eshkimniń eshqandaı kúmáni joq shyǵar dep men oılaımyn», - dedi Májilis tóraǵasy.
Sondaı-aq, ol saılaýdyń aldynda el aralap, halyqtyń qazirgi Prezıdenttiń saıasatyna degen ustanymy qandaı ekenin kórip qaıtqanyn eske saldy.
«Biz bazarlarǵa baryp, jumyssyz júrgen jastarmen kezdestik. Shahtalarǵa deıin tústik. Búkil jerge barsaq ta, qoldaý boldy. Qoǵamdyq uıymdarmen, ártúrli pikiri bar azamattarmen kezdestik. Iá, syn bar. Iá, keıbir máselelerge baılanysty árkimniń óz pikiri bar. Biraq túptep kelgende, Qazaqstanǵa birinshi kezekte turaqtylyq, almaǵaıyp zamanda aýmaǵymyzdyń, tutastyǵymyzdyń saqtalǵany kerek. Syrtta bolyp jatqandardy ishimizge kirgizip almaýymyz kerek. Osyny sizder durys túsinýlerińiz kerek», - dedi Erlan Qoshanov.
Májilis tóraǵasy kezekten tys ótken prezıdent saılaýyna 35-ke jýyq eldiń ókilderi kelip, onyń kóbi oń baǵasyn bergenin aıtty.
«Al eger syn-pikirler bolsa, oǵan Syrtqy ister mınıstrligi óziniń pikirin, jaýabyn aıtty. SİM óziniń kelispeıtinin aıtty. Básekelestik boldy. Bes azamatty qalaısha básekege laıyq emes dep, olardy tómendetýge, quqyǵyn shekteýge bolady? Solaı bola ma? EQYU-nyń buǵan deıin bergen trafaretti usynymdarynyń kóbi eskerildi. Keıbir jerinde psıhıkalyq aýytqýy bar azamattardyń da daýysyn esepteý kerek deıdi. Osy boıynsha synaıdy. Ony qabyldaý kerek pe, joq pa? Óz ustanymymyz, kózqarasymyz bar. Biz egemendi elmiz ǵoı», - dedi spıker.