Memlekettik búdjetten arnaıy qarajat beriledi.
Oqý-aǵartý mınıstri Asqat Aımaǵambetov balabaqshada tegin tamaq kimderge beriletinin túsindirdi, dep habarlaıdy Almaty-akshamy.kz QazAqparatqa silteme jasap.
«Qazirgi ýaqytta bizde balabaqsha kezegine turmaǵan birneshe júz myń bala bar. Olar nege kezekke turmaıdy? Kezekke turmaǵannan keıin, balabaqshaǵa barmaıdy degen sóz. Bizde balabaqshalar negizi aqysyz. Biraq tamaqqa ata-analar ózderi tóleıdi. Onyń somasy ártúrli. Bizdiń qıyn jaǵdaıdaǵy, az qamtylǵan otbasylar osy qarajatty taba almaıtynyn, balabaqshada balalalary tamaqtanatyn aqsha joq ekenin aıtyp, kezekke de qoımaı otyr. Soǵan baılanysty ol balalardyń mektepke daıyndyq, densaýlyq, jaqsy tamaqtaný máselelerine úlken keri áserin tıgizip otyr», - dedi mınıstr.
Vedomstvo basshysy bul bastama Memleket basshysynyń saılaýaldy baǵdarlamasy aıasynda qolǵa alynatynyn eske saldy.
«Sáıkesinshe, osyndaı otbasylar anyqtalyp, sol balalarǵa memlekettik búdjetten arnaıy qarajat berilip, tamaqtaný máselesi de olarǵa tegin bolady. Sonda bizde birneshe júz myń bala balabaqshalarǵa baryp, jaqsy tamaqtanyp, densaýlyǵyna da, oqý úlgerimine de óte tıimdi bolady», - dedi Asqat Aımaǵambetov.