Qazaq ulttyq qyzdar pedagogıkalyq ýnıversıtetiniń stýdentteri sý resýrstaryn únemdi paıdalanýǵa arnalǵan ınovasıalyq jobany iske qosty. Olardyń «Avtomattandyrylǵan sýǵarý júıesi» startapy oqý ordasynda ótken saltanatty shara barysynda resmı túrde tanystyryldy, dep habarlaıdy aqshamnews.kz
Bul joba – QyzPU bazasynda eki jyldan beri ótkizilip kele jatqan Demoday «Startup Tomiris» baıqaýynyń jemisi. 2024 jyly atalǵan konkýrsta İ oryndy ıelengen startaptyń avtorlary – Fızıka, matematıka jáne sıfrlyq tehnologıalar ınstıtýtynyń 3-kýrs stýdentteri Dınara Býlkýnbek pen Ámına Imanova.
Informatıka kafedrasynyń aǵa oqytýshysy ári jobanyń ǵylymı jetekshisi Juldyz Bazaeva bul júıeniń basty maqsaty – turaqty damý qaǵıdattary aıasynda ekologıalyq jáne tehnologıalyq tıimdi sheshim usyný ekenin atap ótti. Al joba avtorlary júıeniń tehnıkalyq erekshelikterimen tanystyryp, onyń jumys isteý algorıtmderin jan-jaqty túsindirdi.
Avtomattandyrylǵan qurylǵy birneshe negizgi komponentten turady: aýa temperatýrasy men ylǵaldylyǵyn ólsheıtin sensor, topyraq ylǵaldylyǵynyń dachıgi, sý sorǵysy men solenoıdty klapandar. Júıe aýa raıy men topyraq jaǵdaıyna qaraı derbes jumys isteıdi, al basqarý arnaıy ázirlengen mobıldi qosymsha arqyly júzege asyrylady. Qosymsha Android jáne iOS platformalarynda qoljetimdi. Onda óshirip-qosý, qolmen jáne avtomatty rejımder qarastyrylǵan.
«Júıe tolyqtaı avtomattandyrylǵan. Eger topyraq qurǵap ketse, sensorlar arqyly bul týraly sıgnal túsip, sýǵarý prosesi ózdiginen bastalady. Mundaı júıe ásirese ýaqyty shekteýli adamdar úshin óte tıimdi», – deıdi joba avtorlary.
Sýǵarý júıesimen qatar gúlzarlardy kórkeıtý jáne klımattyq jaǵdaılarǵa beıimdelgen sýarý tártibi de engizildi. Bul bastama tabıǵatty qorǵaý sharalaryna úles qosyp qana qoımaı, ekologıalyq mádenıetti damytýǵa da yqpal etti.
Jobanyń taǵy bir mańyzdy jetistigi – oǵan avtorlyq quqyq kýáliginiń alynýy. Bul startaptyń ınovasıalyq áleýetin rastaıtyn mańyzdy qadam.
Ýnıversıtettiń Basqarma Tóraǵasy – Rektory Gúlmıra Qanaı jobanyń bolashaǵyna senim bildirip, onyń memlekettik deńgeıde keńinen qoldanylatynyna úmit artty. Sonymen qatar, ol mundaı bastamalar stýdentterdiń praktıkalyq daǵdylaryn nyǵaıtyp, olardy naqty problemalardy sheshýge baǵyttaıtynyn atap ótti..
.